Տնտեսության տարբեր ճյուղերի համար ռազմավարական միջոցառումների փաթեթի վերանայման անհրաժեշտություն է առաջացել, քանի որ կորոնավիրուսի համավարակի հետ կապված ամբողջ աշխարհը փոխվում է: Այս մասին հունիսի 8-ին ՀՀ Ազգային ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի մասի զեկույցի քննարկմանն ասաց էկոնոմիկայի նախարար Տիգրան Խաչատրյանը՝ պատասխանելով պատգամավորների այն հարցերին, թե ինչպիսի քայլեր են նախաձեռնվում արտահանման խրախուսման համար:
Նախարարը, մասնավորապես, հիշեցրեց, որ մեկ տարի իրենք աշխատել են 5 փաստաթղթերի մշակման վրա, որոնցից երեքն առնչվում են արդյունաբերության զարգացման ռազմավարությանը, փոքր եւ միջին բիզնեսի ռազմավարությանը եւ տուրիզմի զարգացման ռազմավարությանը, եւ այստեղ կան արտահանման բաղադրիչներ: «Դրանցից երեքին տրված են տարբեր լուծումներ, քանի որ յուրաքանչյուր փաստաթղթում տարբեր խնդիրներ են դիտարկվում: Օրինակ՝ խոշոր բիզնեսում տեխնիկական վերազինումը համարվում է Հայաստանում ամենակարեւոր խնդիրը: Կառավարությունն այդ փաստաթուղթը կհաստատի մինչեւ տարեվերջ: Իսկ փոքր եւ միջին բիզնեսի դեպքում ամենաէական խնդիրն է համարվում արտահանման ենթակառուցվածքների թույլ լինելը եւ այլն»,- ասաց Խաչատրյանը:
Նրա խոսքով՝ կառավարությունը միջոցառումների մեծ փաթեթ ունի, որում նախատեսված է, թե ինչ պետք է արվի: Ճիշտ է, նախարարը նշեց, որ դրանց մի մասը վերանայման կարիք ունի: «Աշխարհը փոխվում է, եւ նոր ճանապարհներին անցնելու հետ կապված պետք է փոխվեն նաեւ մեր մոտեցումները: Նպատակները նույնն են. ունենալ մրցունակ տնտեսություն, մրցունակ ծառայություններ, բայց միջոցները պետք է փոխվեն, քանի որ փոխվել են նաեւ խնդիրները»,- ամփոփեց Տիգրան Խաչատրյանը:
