Հայաստանը ստացել է 1,3 մլրդ դոլարի միջազգային աջակցություն, իսկ պարտքը, որը մենք վճարում ենք ցուցաբերված աջակցության դիմաց, անհամեմատ ավելի ցածր է: Այս մասին հունիսի 8-ին ՀՀ Ազգային ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի մասի զեկույցի քննարկմանն ասաց ՀՀ ֆինանսների նախարար Ատոմ Ջանջուղազյանը:
Ընդ որում՝ նա դժվարացավ նշել կոնկրետ թիվ: «Ներկայումս ես դժվարանում եմ կոնկրետ թիվ նշել, բայց պատկերացրեք, որ խոսքը մի քանի հարյուր հազար դոլարի մասին է, ինչն, իհարկե, քիչ չէ, բայց եթե խոսում ենք 1,3 մլրդ դոլարի առկայության մասին, ապա դժվար է այս պարտքը մեծ համարել»,- նշեց նախարարը: