Հայաստանը հրաժարվել է Հայկական ԱԷԿ-ի երկրորդ էներգաբլոկի շահագործման ժամկետի երկարացման ծրագրի իրականացման համար տրված ռուսական վարկի մնացած մասից: Այս մասին հունիսի 8-ին ՀՀ Ազգային Ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանն ասաց ՀՀ տարածքային կառավարման և ենթակառուցվածքների նախարար Սուրեն Պապիկյանը:
Ըստ նրա՝ այս փուլում բավականին մեծ աշխատանք է կատարվել բլոկի վրա: Այնուամենայնիվ, մի շարք ընթացակարգային խնդիրների արդյունքում, օբյեկտիվ եւ սուբյեկտիվ պատճառներով, նոր իշխանությունները հերթական անգամ արդեն իսկ ուշացած ծրագիր են ժառանգություն ստացել:
«Ակնհայտ են ժամկետների ուշացումները: Վերջին տարում ակտիվորեն քննարկվում էր վարկի մարման ժամկետները երկարաձգելու եւ նոր արտոնյալ ժամկետներ տրամադրելու հարցը, սակայն դա տեղի չունեցավ: Այդպես, հայկական կողմը հրաժարվեց այս վարկից եւ կներգրավի իր սեփական ռեսուրսները: Մենք պայմանավորվածություններ ունենք «Ռոսատոմ»-ի հետ աշխատանքների շարունակման վերաբերյալ, որոնք կիրականացվեն արդեն Հայաստանի ներքին ընթացակարգերի համաձայն»,- նշեց Պապիկյանը:
Դա, նախարարի խոսքով, հայ մասնագետներին հնարավորություն կտա ներգրավվել ծրագրի իրականացման գործընթացում, ինչը շատ կարեւոր է կորոնավիրուսի համավարակով պայմանավորված տնտեսական ճգնաժամի պայմաններում:
Նա նաեւ արձանագրեց, որ նոր իշխանությունները վարկային համաձայնագիր են ժառանգել, որից կամ պետք էր հրաժարվել, կամ երկարաձգել: Սակայն հրաժարվել անհնար է, քանի որ կան աշխատանքներ, որոնք սկսվել են, սակայն չեն իրագործվել, եւ պետության համար կարեւոր է դրանք հասցնել իրենց տրամաբանական ավարտին:
«Լուրջ առաջընթաց է գրանցվել երկրի առեւտրային բանկերի հետ բանակցություններում, եւ ծրագրի ֆինանսական հարցը, կարծես թե, ամբողջությամբ լուծված է»,- ընդգծեց նախարարը:
