Բարձրաստիճան պաշտոնյաների գործողությունները չպիտի հակասեն վարչապետի ուղերձներին: Այս մասին այսօր՝ հունիսի 8-ին, պարետատան նիստին հայտարարեց ՀՀ վարչապետ Նիկոլ Փաշինյանը՝ անդրադառնալով ՀՀ ԱԱԾ տնօրենի, ՀՀ ԳՇ պետի եւ ՀՀ ոստիկանապետի պաշտոնանկություններին։
«Ուզում եմ պարոնայք Արման Սարգսյանին եւ Էդուարդ Մարտիրոսյանին շնորհակալություն հայտնել այս ընթացքում իրենց կատարած աշխատանքի եւ ներդրած ջանքի համար։ Նրանք կլքեն իրենց այսօրվա պաշտոնը, բայց ես չեմ կարծում՝ նրանք ՀՀ-ին, ժողովրդին, պետությանը ծառայելու պոտենցիալը սպառել են։ Եթե նրանք այս թեմայի վերաբերյալ հետաքրքրություն եւ պատրաստակամություն ունենան, իհարկե, մենք այդ հարցը կքննարկենք»,- ասաց Փաշինյանը։
Վարչապետի խոսքով՝ առաջին հերթին հենց բարձրաստիճան պաշտոնյաներն են, որ պետք է իրենց օրինակով ցույց տան հակահամաճարակային կանոնների պահպանման կարեւորությունը.
«Ցավոք սրտի, մենք հանդիպում ենք դեպքերի, որ այդպես տեղի չի ունենում։ Չի կարող լինել մի այնպիսի իրավիճակ, երբ պետական բարձրաստիճան պաշտոնյայի գործողությունները, եթե նույնիսկ դրանք դե յուրե առնչությունների խնդիր ունեն եւ դրանք հակասեն վարչապետի տված հրապարակային ուղերձներին։ Ուզում եմ, որ սա բոլորի համար լինի պարզ ու հստակ. չի կարող լինել ուղղակի այնպիսի իրավիճակ, որ պետական բարձրաստիճան պաշտոնյայի գործողությունները հակասեն վարչապետի ասածի տեքստին եւ կոնտեքստին եւ դրան չհետեւի կոկրետ գործողություն։ Դա դուրս է մարդկային, անձնական հարաբերություններից։
Այս թեմայով այս դահլիճում եղել է խոսակցություն, ինձ թվացել է, որ իմ ուղերձը բավարար չափով լուրջ է եւ այդ լրջությունը պետք է գնահատել։ Իմ ասածի մեջ որեւէ բան չի փոխվել եւ չի փոխվելու»։
