Հունիսի 9-ից Կիպրոսը վերականգնում է մյուս երկրների հետ ավիահաղորդակցությունը, սկսում են աշխատել Լառնակայի եւ Պաֆոսի օդանավակայանները, փոխանցում է «ՌԻԱ Նովոստի»-ն:
Կղզու օդանավակայանները կորոնավիրուսի համավարակի պատճառով փակվել էին մարտի 21-ից, բացառություն էր արվել միայն բեռների ավիափոխադրումների եւ հումանիտար ու բժշկական բեռնափոխադրումների, ինչպես նաեւ կիպրոսցիների հայրենադարձության համար:
Մայիսի 4-ից Կիպրոսը սկսել է կորոնավիրուսի համավարակի պատճառով մտցված սահմանափակումներն աստիճանաբար թուլացնել:
Նախատեսվում է Կիպրոսի օդանավակայանների բացման եւ մյուս երկրների հետ կապերի վերականգնման երկու փուլ. առաջին փուլը՝ հունիսի 9-19-ը, երկրորդ փուլը՝ հունիսի 20-ից:
Համաճարակաբանական պատկերի հիման վրա սահմանվել է երկրների 2 կարգ, որոնց հետ Կիպրոսի օդային հաղորդակցությունը վերականգնվել է: «Ա» կարգի մեջ են մտել Հունաստանը, Մալթան, Բուլղարիան, Նորվեգիան, Ավստրիան, Ֆինլանդիան, Սլովենիան, Հունգարիան, Իսրայելը, Դանիան, Գերմանիան, Սլովակիան, Լիտվան: «Բ» կարգի՝ Շվեյցարիան, Լեհաստանը, Ռումինիան, Խորվաթիան, Էստոնիան, Չեխիան:
Առաջին փուլում երկու կարգերի երկրներից ճանապարհորդները օդանավ բարձրանալու թույլտվություն ստանալու համար պետք է ներկայացնեն հավաստագված լաբորատորիաների լաբորատոր փորձարկումների հավաստագիր՝ COVID-19-ի բացասական արդյունքով, կատարված թռիչքից 72 ժամ առաջ:
