Կորոնավիրուսի համավարակի ընթացքում ՀՀ մարդու իրավունքների պաշտպանի գրասենյակը գործում է շաբաթական 7 օր, օրական 24 ժամ: Այս մասին հունիսի 9-ին ՀՀ Ազգային ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանն ասաց հանրապետության գլխավոր իրավապաշտպան Արման Թաթոյանը:
Նա, մասնավորապես, շնորհակալություն հայտնեց իր աշխատակիցներին՝ նվիրված աշխատանքի համար: «ՄԻՊ գրասենյակը գործում է ծայրաստիճան ծանրաբեռնված ռեժիմով եւ իր անձնվիրության շնորհիվ իրականացնում է իր բարդ խնդիրը»,- շեշտեց Թաթոյանը: Նա նշեց, որ 2019 թվականին երկու բյուջետային ծրագրի իրականացման համար ՄԻՊ գրասենյակը 14 միջոցառում է նախատեսել:
Թաթոյանը նաեւ պատասխանեց իշխող «Իմ քայլը» դաշինքի պատգամավոր Համազասպ Դանիելյանի հարցերին, ով, մասնավորապես, հետաքրքրվեց միջոցների ծագմամբ եւ քանակով, որոնք օմբուդսմենի գրասենյակը ստանում է միջազգային դոնորներից աջակցության տեսքով:
Իրավապաշտպանը նշեց, որ գրասենյակն իր գործունեության համար հիմնական միջոցները ստանում է պետբյուջեից, սակայն գումար է ստացվում նաեւ արտաքին դոնորներից՝ ի դեմս տարբեր միջազգային կազմակերպությունների: «Սակայն, այնուամենայնիվ, միջոցների 95.5 տոկոսը մենք ստանում ենք պետական բյուջեից»,- շեշտեց Արման Թաթոյանը: