Իտալիայում կարաբիներները 59 մարդ են ձերբակալել՝ մաֆիոզային գործունեության մեղադրանքով. օպերացիան հարվածել է նեապոլիտանյան «Կամորրա» հանցավոր կազմակերպության երեք կլաններին, հայտնում է «ՌԻԱ Նովոստի»-ն:
Ինչպես լրագրողներին հայտնել են կարաբիներների ներկայացուցիչները, հետաքննությունը «բացահայտել է գործարարության եւ քաղաքականության ոլորտում համատեղ մասնակցության սերտ ցանցը»: Դրա մասնակիցները մեղադրվում են մաֆիոզային կազմակերպության ստեղծման, ընտրությունների անցկացման ժամանակ կոռուպցիայի, շորթման եւ աճուրդներին խարդախության մեջ:
Ձերբակալություններից բացի կիրականացվի նաեւ «ավելի քան 80 միլիոն եվրո արժողությամբ գույքի առգրավում»:
La Repubblica թերթն օպերացիայի կապակցությամբ նշում է, որ կարաբիներները ձերբակալել են նաեւ Սիլվիո Բեռլուսկոնիի «Առաջ, Իտալիա» կուսակցությունից սենատոր Լուիջի Չեզարոյի երեք եղբայրներին: Նրանցից երկուսը տնային կալանքի տակ են: Երրորդը՝ Նեապոլի հյուսիսային արվարձանում գտնվող բժշկական կենտրոնի սեփականատերը, կալանավորված է: