Fitch միջազգային վարկանիշային գործակալությունը քիչ հավանական է համարում նավթի գների անկումը բարելի դիմաց 30 դոլարից զգալիորեն ավելի ցածր: Այս մասին նշված է գործակալության մամուլի հաղորդագրության մեջ, փոխանցում է ՏԱՍՍ-ը:
«Մենք կարծում ենք, որ բարելի դիմաց 30 դոլարից զգալիորեն ավելի ցածր նավթի գնանկման սթրեսային սցենարը հիմա քիչ հավանական է: Շուկան 2020 թվականի երկրորդ կեսին ավելի շուտ կբախվի արտադրության դեֆիցիտին՝ պահանջարկի աստիճանական բարելավման եւ առաջարկի կրճատման պատճառով»,- նշված է հաղորդագրության մեջ:
Եվս մեկ ամսով նավթի արդյունահանման ռեկորդային կրճատումը երկարաձգելու մասին ՕՊԵԿ+ համաձայնագիրը պետք է արագացնի շուկայում հավասարակշռության վերականգնումը, կարծում է Fitch-ը: Սակայն առայժմ պարզ չէ՝ այսօրվա դրությամբ նավթի գների վերականգնումն արդյո՞ք կայուն է: ՕՊԵԿ+-ի մեջ չմտնող երկրներում, հատկապես ԱՄՆ-ում հումքի արդյունահանումը զգալի ազդեցություն կունենա պահանջարկի եւ առաջարկի հաշվեկշռի վրա: Տարվա առաջին կեսին կուտակված նավթի պաշարների նորմալացումը կտեւի մի քանի ամիս, կանխատեսում է գործակալությունը:
Նավթի բարելի դիմաց 40 դոլար գինը կարող է հանգեցնել ԱՄՆ ընկերությունների արդյունահանման ծավալների աճի, ինչը կսահմանափակի շուկայում գների վերականգնումը: 30 դոլար գնի դեպքում արտադրողներն ի վիճակի կլինեն կայունացնել իրենց արդյունահանումը, նշում է Fitch-ը:
Ըստ Fitch-ի գնահատականների՝ ՕՊԵԿ+ երկրները արդյունահանումը մայիսին մարտի համեմատ կրճատել են օրական գրեթե 7,5 մլն բարելով: Հունիսին գործարքի անդամ երկրների ընդհանուր կրճատումները պետըք է գերազանցեն օրական 9 մլն բարելը:
Ապրիլին Fitch-ը 2020 թվականին Brent տեսակի նավթի միջին տարեկան գնի կանխատեսումը պահպանել էր բարելի դիմաց 35 դոլարի մակարդակում: Ընդ որում՝ բարելի դիմաց մինչեւ 45 դոլար գնաճ է սպասվում 2021 թվականից ոչ շուտ, իսկ մինչեւ 53 դոլար՝ 2022 թվականից ոչ շուտ: