Սահմանադրական դատարանի դատավոր Վահե Գրիգորյանը, ով առաջադրվել էր այս պաշտոնի համար իշխող «Իմ քայլը» դաշինքի կողմից, երբեք չի մասնակցել դատարանի աշխատանքներին, սակայն կանոնավոր կերպով աշխատավարձ է ստացել եւ օգտվել է ծառայողական ավտոմեքենայից: Այս մասին հունիսի 9-ին ՀՀ Ազգային Ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանը, պատասխանելով «Լուսավոր Հայաստան» կուսակցության պատգամավոր Աննա Կոստանյանի հարցերին, ասաց Սահմանադրական դատարանի աշխատակազմի ղեկավար Էդգար Ղազարյանը:
Ըստ խորհրդարանականի՝ հունիսի 7-ին լրացավ մեկ տարին, ինչ Վահե Գրիգորյանը զբաղեցնում է Սահմանադրական դատարանի դատավորի պաշտոնը:
«Այս ընթացքում նա չի մասնակցել Սահմանադրական դատարանի աշխատանքներին, սակայն 793 հազար դրամ աշխատավարձ է ստացել, օգտվել է ծառայողական ավտոմեքենայից եւ դրա համար վառելիք է ստացել: Տարվա ընթացքում նա ընդհանուր 15 միլիոն դրամ է ստացել»,- ընդգծեց պատգամավորը:
Կոստանյանը խնդրեց հաստատել իր ներկայացրած տվյալները՝ ընդ որում հայտնելով, որ շուտով համապատասխան հայց կուղարկի ՍԴ: Իր հերթին, Ղազարյանը նշեց, որ ֆինանսների մասով նա կպատասխանի գրավոր հարցմանը՝ թվերում չսխալվելու համար, բայց հաստատեց Գրիգորյանի՝ ՍԴ-ի աշխատանքներին չմասնակցելը:
«Պաշտոնը ստանձնելուց հետո դատավոր Վահե Գրիգորյանը չի մասնակցել Սահմանադրական դատարանի որեւէ նիստի, չի ներգրավվել դատական կազմում, դատարանին չի ներկայացրել զեկույցներ իրեն ուղարկված դատական գործերի նախաքննության արդյունքների վերաբերյալ: Նա նաեւ չի զբաղվել որոշումների նախագծերի եւ գործերի վերաբերյալ այլ նյութերի նախապատրաստմամբ, որոնցով զեկուցող կամ համազեկուցող էր նշանակվել: Ինչ վերաբերում է աշխատավարձին, ապա այն վճարվել է ժամանակին, եւ աշծատակազմն այլ լիազորություններ չունի: Մի քանի անգամ Գրիգորյանին պարգեւավճարներ են դուրս գրվել, սակայն պարգեւավճարներ են ստացել սահմանադրական դատարանի բոլոր դատավորները: Ընդ որում, հետագայում, ՍԴ նախագահի որոշմամբ, դատարանի աշխատանքներին չմասնակցելու պատճառով Գրիգորյանին պարգեւավճարներ այլեւս չեն տրվել»,- ասաց Ղազարյանը:
Նա նաեւ նշեց, որ Գրիգորյանն ապահովված է անհրաժեշտ գույքով, կապի միջոցներով, ծառայողական ավտոմեքենայով եւ գրասենյակով:
Խոսելով Սահմանադրական դատարանում պարգեւավճարների մասին՝ Ղազարյանը նշեց, որ նախկինում դրանց համար նախատեսված էր աշխատավարձերի մոտ 30 տոկոսը: Ընդ որում, վճարումներն իրականացվել են 28.6 տոկոսի չափով:
