Հայաստանում որոշ դատավորների վարույթում ավելի քան 3 հազար քաղաքացիական գործ կա: Այս մասին հունիսի 9-ին ՀՀ Ազգային Ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանը, պատասխանելով պատգամավորների հարցերին, ասաց Դատական դեպարտամենտի ղեկավար Կարեն Փոլադյանը:
Ըստ Փոլադյանի՝ դատական համակարգի ծանրաբեռնվածության խնդրի լուծումը ոչ թե դատավորների թվի ավելացման, այլ քննվող գործերի կրճատման մեջ է:
«Կարելի է որոշակի ֆինանսական շեմ սահմանել, իսկ որոշ գործեր քննել նոտարական կարգով: Օրինակ, որպեսզի բանկերի եւ վարկային կազմակերպությունների ֆինանսական պահանջների մասին գործերը, երբ խոսքը մինչեւ 2 միլիոն դրամի մասին է, չհասնեն դատարաններ»,- պարզաբանեց Դատական դեպարտամենտի ղեկավարը:
Ինչպես նշեց Փոլադյանը, քաղաքացիական գործերով զբաղվող դատավորները միջինում մինչեւ հազար նման դեպք են քննում: Սակայն, նրա խոսքով, կան դատավորներ, որոնց վարույթում մինչեւ 3 հազար գործ կա:
«Նման իրավիճակ է, օրինակ, Շիրակի դատարանում, Երեւանի դատարանում: Այդպիսի դատավորները քիչ են, բայց նրանք կան»,- շեշտեց Փոլադյանը:
Նա կարծում է, որ մի դատավորի վարույթում հազար գործը բացարձակապես աննորմալ է:
«Որոշ դատավորներ, օրինակ՝ Սյունիքի եւ Արմավիրի մարզերում, 100-120, 130 քրեական գործեր ունեն: Երեւանում դատավորները միջինում 80 դեպք են քննում»,- ասաց Դատական դեպարտամենտի ղեկավարը՝ պարզաբանելով, որ խոսքը միայն գործերի մասին է, այլ ոչ թե միջնորդությունների կամ բողոքների:
