Մայիսի վերջին ես տեսա Հայաստանի առողջապահության նախարարի հայտարարությունը եւ հասկացա, որ պետք է գամ տուն եւ միանամ Հայաստանում իմ գործընկերներին, ովքեր պայքարում են կորոնավիրուսի դեմ: Շնորհակալություն եմ հայտնում նախարարին՝ ժամանելու մասին իմ խնդրանքով անհապաղ արձագանքելու համար:
Այս մասին մայիսի 9-ին պարետատան նիստին հայտարարեց Գերմանիայից վերջերս վերադարձած ռեանիմատոլոգ Արսեն Մանուկյանը, ով աշխատում է «Սուրբ Գրիգոր Լուսավորիչ» բժշկական կենտրոնում: «Աննկարագրելի է այն, ինչ անում են բժշկական կենտրոնի վերակենդանացման բաժանմունքի աշխատակիցները: Նրանք, վտանգելով իրենց ֆիզիկական եւ հոգեբանական առողջությունը, ամեն օր պայքարում են մահվան դեմ»,- նշեց նա: Ըստ նրա՝ մարտ-ապրիլ ամիսներին Գերմանիայում վերակենդանացման բաժանմունքներում նույնպես կորոնավիրուսով բազմաթիվ հիվանդներ կային, եւ իրավիճակը բարդ էր, սակայն մայիսին, քաղաքացիների կարգապահության շնորհիվ, հիվանդությունը սկսեց նահանջել:
Նա հիշեցրեց, որ ոչ ոք ապահովագրված չէ այս հիվանդությունից, եւ բոլորին հորդորեց պահպանել անվտանգության միջոցները, քանի որ կանխարգելումը վարակի դեմ պայքարի ամենաարդյունավետ մեթոդն է: «Հուսով եմ, որ հիվանդության տեմպերը Հայաստանում թույլ կտան ինձ մեկնել Գերմանիա եւ ներկա գտնվել որդուս ծննդյան տարեդարձին, ով շուտով կդառնա մեկ տարեկան: Այժմ նրա խնամքն ամբողջությամբ կնոջս ուսերին է»,- եզրափակեց Մանուկյանը:
