Մեղրաձորի ողբերգական դեպքից հետո թունավորմամբ հիվանդանոց տեղափոխված 5 տղամարդիկ չեն հոսպիտաացվել, բուժօգնություն ստանալուց հետո իրենց համաձայնությամբ տուն են գնացել։ Այս մասին NEWS.am-ին հայտնեցին Հրազդանի բժշկական կենտրոնից։

Տղամարդիկ, ըստ նախնական տեղեկության, թունավորվել էին, երբ փորձել էին հանքախորշում մահացած 3 երիտասարդի դիերը դուրս բերել այնտեղից։

Ավելի վաղ հայտնել էինք, որ կեսգիշերին երեք երիտասարդի դի է հայտնաբերվել «Մեղրաձոր-Գոլդ» ԱՊԸ-ին պատկանող՝ չգործող հանքի թունելում։ Նախնական տեղեկություններով՝ նրանք մահացել են շմոլ գազից: Մահացածներն են Մեղրաձորի բնակիչներ ՝ 34-ամյա Բագրատ Խաչատրյանը, 29-ամյա Հայկ Սաֆարյանը եւ 27-ամյա Արամ Գոգոլյանը։ Նրանց մարմինները դուրս բերելու համար ԱԻՆ աշխատակցիները, քաղաքացիները եւ ոստիկանները 2 մետր քայլելով մոտեցել են ոսկու հանքին։ Ավելի ուշ պարզվել է, որ մահացածներին հանքից դուրս բերելու փորձի ժամանակ 5 մեղրաձորցի է թունավորվել, որոնք սուր «էկզոգեն թունավորում՝ հանքահորի գազով» ախտորոշմամբ տեղափոխվել են Հրազդանի բժշկական կենտրոն։

Առայժմ պարզ չէ՝ մահացածները «Մեղրաձոր-Գոլդ»-ի աշխատակիցներ են, թե ոչ։

Ոստիկանությունում դեպքի առթիվ նյութեր են նախապատրաստվում։