Գեղարքունիքի մարզում կորոնավիրուսով վարակվածների 683 դեպք կա, գրանցվել է մահվան 13 դեպք։ Այս մասին այսօր՝ հունիսի 10-ին, ԱԺ-ում լրագրողների հետ զրույցում ասաց մարզպետ Գնել Սանոսյանը։

«Այս պահին մարզում ունենք 683 դեպք, որոնցից 280-ն են բուժում ստանում, նրանցից 60-ը գտնվում է հիվանդանոցում մյուսները, կամ իրենց տանն են կամ մեկուսացման վայրում, բուժվել է 400-ից ավելի քաղաքացի, մահվան 13 դեպք ունենք»,- ասաց մարզպետը։

Սանոսյանի խոսքով՝ վերջին 4 օրերին մարզի ցուցանիշները բավականին հուսադրող են. «Տեղյակ եք, որ մոտ 20 օր Գեղարքունիքը մնում էր միակ մարզը, որտեղ չկար դեպք։ Դա բերեց նրան, որ Հանրապետության տարբեր վայրերից մեր քաղաքացիները տեղափոխվեցին մեզ մոտ։ Մենք մի շարք համայնքներում ունենք արձանագրված դեպքեր, երբ որեւէ քաղաքացու տեղափոխության արդյունքում է վարակը տարածվել։ Դժբախտաբար, որոշ վայրերում ունեցանք խոշոր բռնկումներ եւ ստիպված եղանք փակել բնակավայրեր։ Եղել է 2 օր 13 կամ 14 դեպք»։