Արմավիրի մարզում մինչեւ այժմ 814 մարդ է վարակվել կորոնավիրուսով, որոնց կեսն արդեն առողջացել է, գրանցվել է 21 մահ։ Այս մասին այսօր՝ հունիսի 10-ին, ԱԺ-ում լրագրողների հետ զրույցում ասաց Արմավիրի մարզպետ Համբարձում Մաթևոսյանը։
«Ցավոք, մարզում կորոնավիրուսի տարածման աճ կա, աճը կայուն է, բայց, մյուս կողմից էլ առանձնացված համայքներ չունենք, որ տարածման օջախ են, հիմա այն համայնքները, որտեղ վիրուսը արագ է տարածվում, Տանձուտ եւ Փարաքար համայնքներն են։ Տանձուտում 30 վարակակիր կա»,- ասաց մարզպետը՝ նշելով, որ չի բացառվում, որ մուտքի եւ ելքի սահմանափակումներ դրվեն այդ համայքներում։
Մարզում 1000 ինքնամեկուսացված կա, ըստ մարզպետի՝ չի բացառվում, որ մարզում չկան համայնքներ, որտեղ որ չլինեն վարակակվածներ՝ հաշվի առնելով այն փաստը, որ ասիմպտոմ հիվանդների թիվը մեծ է։ Նրա խոսքով ՝վերահսկողություն են իրականացնում, ոչ միայն ոստիկանությունը, այլեւ մարզպետարանի, համայնքապետարանների կողմից նշանակված խմբեր։
Մարզում կատարվում են թեստավորումներ, պոլիկլինիկաները հսկում են թեթեւ ձեւերը, իսկ ծանրերը բուժվում են մայրաքաղաքում։ Մարզպետի խոսքով՝ քննարկվում է անհրաժեշտության դեպքում նաեւ մարզային մի քանի հիվանդանոցներ վերապրոֆիլավորելու հնարավորությունը․ դրանք են՝ Մեծամորի ինֆեկցիոն, Արմավիրի եւ Վաղարշապատի։