ԲՀԿ-ի կողմից ընդդիմության կոնսոլիդացիայի կոչերին ես շատ թերահավատորեն եմ նայում, քանի որ ԲՀԿ-ն իմ գնահատմամբ հանրության շրջանում այդ աջակցությունը, այդ վարկանիշը այս պահին չունի իշխանափոխություն կատարելու: Այս մասին այսօր՝ հունիսի 10-ին, ԱԺ-ում լրագրողների հետ զրույցում նշեց Կոտայքի մարզպետ Ռոմանոս Պետրոսյանը:
«ՀՀ-ում իշխանափոխություն անողը կամ չանողը ժողովուրդն է: Կոչերը կարող են հնչել, փորձեր կարող են իրականացվել, իհարկե արտակարգ դրության ավարտից հետո, բայց ես խիստ թերահավատորեն եմ վերաբերվում դրան: Իսկ այդ կոչերը պայմանավորված են մի քանի հանգամանքներով, որոնց մասին խոսեց վարչապետի խոսնակը, ես չէի ուզի որեւէ բան ավելացնել:
ԲՀԿ-ի մոտիվացիան հետեւյալն է. մենք արդեն այսօր հայտարարել ենք, որ ՀՀ-ում օլիգարխիա չկա: Օլիգարխիան բիզնեսի եւ կլանային կառավարման այն խավն է, որը ուղղակի ազդեցություն ունեն երկրի կառավարման ինստիտուտների վրա: Այսօր այդ խավը նման ազդեցություն այսօր չունի: Այդ խավին զրկելով պետական կառավարման վրա ազդելուց, այդ խավին բերելով լիարժեք հարկման դաշտ, բնականաբար այդ խավը կարող է իրեն դիսկոմֆորտ զգալ եւ փորձեր անի նախկին միջավայրին վերադառնալու:
Նրանք հիմա որեւէ ազդեցություն չունեն պետական կառավարման վրա, ընդամենը կարող են իրենց խմբակցության միջոցով ինչ-ինչ օրենքների շրջանակներում, որոնք կարող են սպասարկել տվյալ գործարարի բիզնես շահերը: Դա բերվում է ԱԺ եւ քննարկումների արդյունքում են նման նախագծերը մեժվում, կամ ընդունվում»,- ասաց մարզպետը: