Ի պատասխան ԱԺ պատգամավոր Արման Աբովյանի հարցին, թե արդյո՞ք շտապօգնության աշխատակիցներն այս ամիս պարգևատրվել են, թե ոչ, տեղեկացնեմ, որ Առողջապահության նախարար Արսեն Թորոսյանի կողմից նախատեսվում է պարգևատրում շտապօգնության աշխատակիցներին, ինչպես նախորդ ամիս, այնպես էլ մայիս ամսվա համար: Այս մասին «Ֆեյսբուքում» գրել է ԱՆ մամուլի խոսնակ Ալինա Նիկողոսյանը։
Նշենք, որ հարցն ավելի վաղ բարձրացրել էր ԱԺ ԲՀ խմբակցության պատգամավոր Արման Աբովյանը։
«Սիրելի ժողովուրդ ջան, քիչ առաջ ստացա հեռախոսազանգ մի քաղաքացուց, ով աշխատում է Երևանում ՝ շտապ բուժօգնության ծառայությունում, որպես վարորդ (ում անունը հատուկ չեմ նշում, իր համար առաջացող հնարավոր խնդիրներից խուսափելու համար)։
Ըստ ստացած տեղեկության, այս ամիս՝ Շտապ Բուժօգնության վարորդները և (ենթադրաբար) մյուս աշխատակիցները չեն ստացել՝ այս ամսվա պարգևավճարները։
Հաստատելու կամ հերքելու համար, դիմում եմ իմ ընկերներին, ովքեր աշխատում են շտապ բուժօգնության հաստատություններում։
Առավոտյան նաև պաշտոնապես հարցում կիրականացնեմ»,– գրել էր նա։
