Հայաստանում գյուղատնտեսական արտադրողականությունը ցածր է: Այս մասին ԱԺ մշտական հանձնաժողովների համատեղ նիստում 2019-ի պետբյուջեի կատարողականի մասին զեկույցի քննարկման ժամանակ հայտարարեց էկոնոմիկայի նախարար Տիգրան Խաչատրյանը:
Նրա խոսքով՝ պետությունը շարունակում է խթանիչ քաղաքականությունը դրա արտադրողականության բարձրացման ուղղությամբ:
«2019-ին միակ ոլորտը, որտեղ ցածր տնտեսական ակտիվություն ենք ունեցել, գյուղատնտեսությունն է եղել: 2018 թվականից գրեթե 4 տոկոսով նվազեցում ենք ունեցել: Բնականաբար, կառավարության կողմից իրականացվող բոլոր ծրագրերը, ինչպես նաեւ այն միջոցառումները, որոնք ֆինանսավորվում են պետբյուջեից, ունեն քաղաքական նպատակ, որպեսզի տնտեսություններ օգտագործեն ֆինանսական միջոցները իրենց արտադրողականության բարձրացման եւ գյուղատնտեսության արդյունավետության բարձրացման նպատակով»,-ասաց նախարարը:
Նա նշեց, որ մյուս ծրագրերը եւս ուղղված են այդ նպատակին: Դա կամ անհատական ներդրումային ծրագրերն են, կան ծրագրերը, որոնք լավացնում են ենթակառուցվածքը: «Օրինակ, կա գյուղատնտեսությունը խթանող ծրագիր, որի բյուջեն 2019-ին կազմել է 3,6 մլրդ դրամ: Փաստացի օգտագործվել է 3 մլրդ 116 մլն դրամ: Այն ներառել է վարկերի սուբսիդավորում: Ընդհանուր առմամբ ունենք 8841 վարկառու»,-հայտնեց Խաչատրյանը:
Միեւնույն ժամանակ, նախարարը նկատեց, որ 2019-ին պետբյուջեից նախատեսված է եղել 21,7 մլրդ դրամի չափով ֆինանսավորում, որից 12,8 մլրդ դրամը եղել է գյուղատնտեսության ոլորտում ծրագրերի մի մասը: Ծրագրերի իրականացման համար փաստացի օգտագործված ֆինանսավորումը կազմել է 8,2 մլրդ դրամ, ինչը կազմում է պլանային ցուցանիշի ընդամենը 63,6%-ը:
