Ես հիմա գտնվում եմ գործազրկության մեջ, աշխատում եմ խաղատանը, բայց մարտից խաղատները թույլ չեն տալիս աշխատեն. եթե սահմանափակումներ կան, դա թող անեն բոլորի նկատմամբ, ոչ թե տարբերություն դնեն: Այս մասին այսօր՝ հունիսի 10-ին, կառավարության շենքի դիմաց լրագրողների հետ զրույցում նշեց քաղաքացի Գարիկ Կիրակոսյանը:
«Խաղատները փակել են, ակումբերը չեն թողնում աշխատեն, ես էլ այդ ոլորտի աշխատող եմ, 4 ամիս է չեմ աշխատում: Թող ասեն պատճառը որն է, որ չեն թողնում աշխատեմ: Մարտի 21-ից չենք աշխատում, պետությունից 10 դրամ օգնություն չենք ստացել: Խաղատների գործատուները տուն առ տուն իրենց աշխատողներին սնունդով ապահովել են, բայց ինչքա՞ն կարող են:
Եթե աշխատատեղերը չբացեն, օրենքը չգործի բոլորի համար, այդ խաղատների ու ակումբերի աշխատողները, որ 1000-ից ավել են, իրենց ընտանիքներով գալու են էստեղ, էդքանին հո չե՞ն կարող բերման ենթարկել: Ես ակցիա չեմ անում, ես մենակ կանգնած եմ»,-ասաց նա:
Ոստիկանության աշխատակիցը մոտեցավ եւ ասաց. «Ակցիաները եւ միջոցառումները զանգվածային արգելվում են, ես ողջամիտ 5 րոպե ժամանակ եմ տրամադրում տարածքը լքելու համար: Այլապես բերման կենթարկենք»:
Ոստիկանի խոսքին, որ մեկ է, ձեզ հիմա ոչ ոք չի մոտենալու կառավարությունից, քաղաքացին արձագանքեց. «Ինձ ոչ մեկը չի մոտենալու, որովհետեւ իրենց երեխաների փորը կուշտ ա: Այդ խաղատների ու ակումբների աշխատողները հազար հոգուց ավել են»: