Կորոնավիրուսի համավարակը Հայաստանում ամենաքիչը կանդրադառնա գյուղատնտեսության ոլորտի վրա: Այս մասին հունիսի 10-ին մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանն ասաց ՀՀ էկոնոմիկայի նախարար Տիգրան Խաչատրյանը:
Նա, մասնավորապես, նշեց, որ 2019 թվականին Հայաստանի գյուղատնտեսության ոլորտը միակն էր, որը տարվա արդյունքներով 4 տոկոս անկում էր գրանցել:
Ըստ նրա՝ ոլորտում խնդիրներ են եղել նաեւ վիճակագրության վարման հետ կապված, որն արդեն մի քանի տարի է շտկվում է:
«Չնայած համավարակը կազդի տնտեսության տարբեր ոլորտների վրա, սակայն այն ավելի քիչ կանդրադառնա գյուղատնտեսության վրա, քան՝ մյուս ոլորտների: Տարվա արդյունքներով մենք չենք ասի, որ աճ էին պլանավորում, սակայն անկում գրանցեցինք, բայց կարող ենք հայտարարել, որ մեր սպասելիքներն արդարացվել են»,- ասաց Խաչատրյանը:
Նախարարի խոսքով՝ դրան մեծապես կնպաստի կառավարության կողմից իրականացվող ոլորտի խթանման քաղաքականությանը, այդ թվում՝ գյուղատնտեսական վարկերի սուբսիդավորումը, սեփական ներդրումների խթանումը եւ գոյություն ունեցող հարկային արտոնությունները:
«Կառավարությունն աննախադեպ օգնություն է ցուցաբերում ոլորտին ոչ միայն վարկերի մասով, այլեւ արտոնյալ հարկային դաշտ է ստեղծել: Այդպես, ֆերմերներն ազատվել են եկամտահարկից, ԱԱՀ-ից եւ շահութահարկից»,- ասաց Խաչատրյանը: