Լոռու մարզում բոլոր ձեռնարկությունները գործում են, բացի «Գլորիա» կարի ֆաբրիկայից, որտեղ վարակվածների թիվը մեծ է, բոլոր աշխատակցները համարվում են կոնտակտավորներ եւ գտնվում են ինքնամեկուսացման մեջ։ Այս մասին, այսօր՝ հունիսի 10-ին, ԱԺ-ում լրագրողների հետ զրույցի ժամանակ նշեց Լոռու մարզպետ Անդրեյ Ղուկասյանը:

Մարզպետի հավաստմամբ՝ թեստավորվել է 300 աշխատակից, եւ կոնտակտավորները եւ խառը սկզբունքով, որից հետո նպատակարմար չի եղել բոլորին թեստավորել, քանի որ բոլորը համարվում են կոնտակտավոր եւ պետք է ինքնամեկուսացման ռեժիմում գտնվեն. «Մեկ շաբաթ-10 օրից նրանք ինքնամեկուսացումից դուրս կգրվեն»:

Անդրեյ Ղուկասյանը նշեց, որ այս պահին մարզում 302 վարակված կա, 72 բուժված եւ 4 մահ:

Հարցին՝ Ձեզ որպես քաղաքական գործիչ մինչ հեղափոխությունն ո՞վ էր ճանաչում, եթե չլիներ Նիկոլ Փաշինյանը, մարզպետը պատասխանեց. «Ես մասնագիտությամբ բժիշկ էի եւ մասնագիտությանս բերումով ինձ ճանաչում էին հազարավոր մարդիկ: 10 տարուց ավել աշխատել եմ եւ ունեցել եմ բավականին հաջողություններ ու ճանաչելիություն: Մասնակցել եմ Վանաձորի ՏԻՄ ընտրություններին, եղել եմ ավագանու թեկնածու, եղել եմ 2017 թվականի ԱԺ-ի պատգամավորի թեկնածու, 2018 մարզպետի տեղակալ եւ այժմ՝ մարզպետ»:

Դիտարկմանը, որ Փաշինյանը Գագիկ Ծառուկյանի հետ տնտեսական համագործակցության հուշագիր էր ստորագրել եւ հարցին՝ այն ժամանակ, երբ ստորագրվում էր հուշագիրը, իրենց թիմում դեմ արտահայտվողներ եղե՞լ են, Ղուկասյանը արձագանքեց. «Հեղափոխությունը հնարավորություն է տվել բոլորին փոխել իրենց վարքագիծը եւ հետեւություններ անել իրենց անցյալից: Բայց ժամանակը ցույց է տալիս, որ որոշ գործիչներ հետեւություններ չեն անում եւ սխալներ են թույլ տալիս: Ինչ-որ ուժերի հետ համախմբման հայտարարությունը նույնպես շատ կոպիտ քաղաքական սխալ էր»: