Հայաստանի արտգործնախարար Զոհրաբ Մնացականյանը լարվածության նշաններ չի տեսնում Ռուսաստանի հետ հարաբերություններում: Այս մասին նա հայտարարեց լրագրողների հետ զրույցում: Արտգործնախարարը շեշտեց երկու երկրների միջեւ հարաբերությունների ընդարձակ օրակարգի առկայությունը՝ ինչպես երկկողմ, այնպես էլ բազմակողմ ձեւաչափով:
Պատասխանելով հարաբերություններում հարցերի առկայության մասին դիտողությանը՝ նախարարը նշեց, որ հարցեր չկան այնտեղ, որտեղ չկան հարաբերություններ: «Կան հարցեր, դրանք լուծվում են: Անլուծելի հարցեր չկան: Համատեղ ջանքերով լուծումներ ենք փնտրում: Հիմքում ռազմավարական դաշնակցային հարաբերություններն են»,- վստահեցրեց նախարարը՝ հավելելով, որ ՀՀ կառավարությունը բազմիցս ասել է այդ հիմքի առկայության մասին:
Մեկնաբանելով Ռուսաստանում ՀՀ-ում հետախուզվող մի շարք անձանց մնալու մասին հարցը՝ արտգործնախարարը հիշեցրեց, որ դրանք իրավական բնույթի հարցեր են եւ դրանց հետ կապված շփումները տարվում են համապատասխան ուղիներով: Նախարարի խոսքով՝ հարաբերությունների լարվածության հետ կապված վարկածը կարելի է բացատրել ՀՀ իշխանությունների բաց մոտեցմամ քննարկվող հարցերին: Սակայն դրանք խնդիր, ճգնաժամ համարել պետք չէ:
Ի պատասխան հիշեցմանն այն մասին, որ Ռուսաստանի արտգործնախարարը կոնկրետ գործեր է մատնանշել Հայաստանում ռուսական ընկերությունների հետ կապված՝ այդպիսով հարցն իրավական հարթությունից քաղաքական հարթություն տեղափոխելով, նախարարը համաձայնեց, սակայն, միեւնույն ժամանակ, հիշեցրեց ընկալման տարբերության մասին: «Նշվել են հարցեր, որոնք իրենց պատկերացմամբ կարող են այլ համատեքստում դիտարկվել, քան մենք ենք դրանք դիտարկում: Մենք դրանք իրավական համատեքստում ենք դիտարկում: Դրանք միակ օպերատորները չեն, որոնց հետ կապված այստեղ հարցեր կան: Խնդիրն իրավական է, այլ ոչ թե քաղաքական: Սա երկխոսություն է պահանջում, եւ մենք հիանալի հասկանում ենք միմյանց»,- վստահեցրեց Մնացականյանը: