Կառավարությունն իր այսօրվա՝ հունիսի 11-ի նիստում հավանություն տվեց «ՀՀ ընդերքի մասին» օրենսգրքում եւ հարակից օրենքներում փոփոխությունների փաթեթին:
Հարցը ներկայացրեց տարածքային կառավարման եւ ենթակառուցվածքների նախարար Սուրեն Պապիկյանը՝ նշելով, որ առաջարկվում է ընդերքի ռացիոնալ օգտագործման նպատակով հնարավորինս բացառել հանքավայրերի մասնատումը:
«Նախկինում եղել են դեպքեր, երբ հաստատված պաշարը, հանքավայրի տարածքը բաժանվել է հատվածների, ինչը հնարավորություն է տալիս ավելի բարձր արդյունավետություն ունեցող հատվածները օգտագործել, իսկ ավելի ցածր տոկոսյնություն ունեցողները թողնել Այս նախագծով դա կբացառվի:
Հաջորդը, արդյունահանման թույլտվություններ կտրամադրվեն միայն այն հանքավայրերի դեպքում՝, որտեղ մետաղականի համար, եթե վերջին 5 տարիներին գնահատվել եւ հաստատվել են պաշարներ, իսկ ոչ մետաղականի դեպքում, վերջին 10 տարվա ընթացքում: Սա արվում է նրա համար, որ յուրաքանչյուր գործարչար, ով իսկապես ցանկանում է ներդրում կատարել եւ արդյունավետ շահագործում իրականացնել, նախ իրականացնի համապատասխան ուսումնասիրություն, քանի որ ՀՀ-ում վերջին ուսումնասիրությունները կատարվել են 1950-ական թվականներին:
Մեկ այլ փոփոխությամբ գործող իրավունքի տրամադրման 50 տարի առավելագույն ժամկետը փոխել 25 տարվա, իսկ ոչ մետաղականների համար 15 տարվա:
Առաջարկում ենք նաեւ ընդերքօգտագործման գրավադրումն իրականացնել ոչ թե տեղեկացմամբ, այլ նախապես համաձայնության ստացման ընթացակարգով, իսկ համաձայնություն կտրվի այն դեպքում՝, եթե գրավի հիմքով ձեռք բերված փոխառությունըօգտագործվի տվյալ հանքավայրերի շահագործման եւ ընդերքօգտագործողի պարտավորությունների իրականացման նպատակով»,-ասաց նախարարը:
Նա ընդգծեց, որ սահմանվում է նաեւ, որ եթե տեսչական մարմնի եզրակացության հիման վրա որոշում է կայացվում կասեցնել հանքի գործունեությունը, իսկ սեփականատերը դիմում է դատարան, հանքը մնում է կասեցված, մինչեւ դատարանի որոշումը: