«Ղարաբաղյան իսլամական դիմադրության շարժման» նախագահ Ռովշան Ահմեդլին լքել է ընդդիմության Ազգային խորհուրդը: Այս մասին Ռովշան Ահմեդլին հայտարարել է իր ֆեյսբուքյան էջին, հայտնում է haqqin.az- ը:
«Տարբեր հարցերի վերաբերյալ տարբեր տեսակետներ ցույց տալը նորմալ երեւույթ է եւ ժողովրդավարության ցուցանիշ: Բայց, միեւնույն ժամանակ, ադրբեջանական ժողովրդի անփոփոխ ազգային-հոգեւոր եւ կրոնական արժեքներ գոյություն ունեն, որոնք հնարավոր չէ անտեսել եւ առավել եւս՝ նվաստացնել: Այս տարիների ընթացքում մենք չսովորեցինք հարգանքով վերաբերվել միմյանց դիրքորոշմանը: Իրադարձությունները ցույց տվեցին, որ մենք չկարողացանք ազատվել հավակնություններից եւ մոնոլիտ միավորուման վերածվել»,- ասել է Ռովշան Ահմեդլին:
Ահմեդլին հայտարարել է, որ շատ վշտացած է Ազգային խորհրդի ներսում տեղի ունեցած վերջին իրադարձություններից: «Չնայած այս ասոցիացիան պահպանելու եւ մարդկանց ակնկալիքները բավարարելու իմ բոլոր փորձերին՝ ստեղծված իրավիճակում այլեւս հնարավոր չեմ համարում գտնվել Ազգային խորհրդի կազմում եւ լքում եմ այն»,- գրել է Ռովշան Ահմեդլին՝ Ազգային խորհրդի մյուս անդամներին կոչ անելով դադարեցնել կոնֆլիկտները: