Ոնց կարելի է նման հարցադրում անել առանց փաստարկների. եթե դուք այդ հարցը տալիս եք, խնդրում եմ ասեք՝ ի՞նչ փաստարկներով եք այդ հարցը տալիս: Այս մասին, այսօր՝ հունիսի 11-ին, լրագրողների հետ զրույցում նշեց ՀՀ փոխվարչապետ Մհեր Գրիգորյանը՝ անդրադառնալով հարցին, թե արդյոք այս կառավարությանը անվստահություն հայտնելու հիմքեր կան թե ոչ:
Դիտարկմանը, թե ընդդիմությունը պնդում է, թե բոլոր ոլորտներում անկում է գրանցվում, փոխվարչապետն ասաց. «Նախ, ես համաձայն չեմ, որ անկում է բոլոր ոլորտներում: Այո, չի բացառվում, որ արտաքին պարտքը կաճի, բայց ես կարծում եմ, որ դա բնական գործընթաց է: Մենք գործ ունենք ռեցեսիայի հետ: Ուզում եք ասել, որ եթե աշխարհում ինչ-որ բան է կատարվում, մեր մոտ դրա հետևանքը պետք է չզգա՞նք: Եկեք լայն նայենք հարցին: Ո՞նց կարելի է նման հարցադրում անել՝ առանց հասկանալու, թե ինչի մասին է խոսքը: Իսկ ո՞ր երկրում տնտեսական անկում չի լինելու 2020 թվականին, կարո՞ղ եք ասել: Ասեք մի օրինակ»:
