Կորոնվիրուսի հետ կապված սահմանափակումներ մտցնելու սկզբից մինչեւ այսօր դեսպանությանը հաջողվել է կազմակերպել Հայաստանից Ռուսաստան 981 մարդու վերադարձը: Այս մասին հունիսի 11-ին առցանց մամուլի ասուլիսում ասաց Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը:
Նրա խոսքով՝ Ռուսաստանի քաղաքացիների վերադարձի ապահովման աշխատանքներին ներգրավված են բոլոր ռեսուրսները: Միաժամանակ, դեսպանը կոչ արեց ուշադիր հետեւել տեղեկություններին, որ հրապարակվում են դեսպանության կայքում եւ այլ աղբյուրներում: «Վերադարձի գործընթացն ապահովվում է ավիաչվերթների կազմակերպմամբ եւ Վրաստանի տարածքով ցամաքային տրանսպորտով: Իսկ իրենց ավտոմեքենաներով սահմանին հայտնված քաղաքացիների վերադարձը հեշտ խնդիր չէ, սակայն դեսպանությանը հաջողվել է լուծել արդեն 4 խմբերի վերադարձը Վրաստանի սահմանով: Այս հարցը պահանջում է նաեւ վրացական կողմի համաձայնությունը, քանի որ հենց Վրաստանն է ընդունում անցնել թույլ տալու որոշումը: Հարցը կապված է նաեւ Ռուսաստանի կոնկրետ մարզում համաճարակային իրավիճակի հետ»,- պարզաբանեց Կոպիրկինը:
Դեսպանը շնորհակալություն հայտնեց վրացական կողմին կառուցողական համագործակցության համար:
