Նախեւառաջ մենք պետք է ինքներս մեզ համար որոշենք, որ մաքսային եւ հարկային սահմանը սկսվում է «Մեղրի» Ազատ տնտեսական գոտու սահմանից: Այսինքն, այս գոտի մուտք գործած անձինք պետք է հնարավորություն ունենան վճարել եւ տնտեսական գործառնություններ իրականացնել արտարժույթով: Այս մասին հունիսի 11-ին մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանը, պատասխանելով պատգամավորների հարցերին, ասաց ՀՀ կառավարության փոխվարչապետ Մհեր Գրիգորյանը:
Ըստ նրա՝ եթե «Մեղրի» ԱՏԳ -ում որեւէ ձեռնարկություն է գործում, ապա այն պետք է ոչ ռեզիդենտ համարվի հայկական կողմի համար՝ ինչպես հարկային, այնպես էլ արտարժույթի եի մաքսայինի օրենսդրության առումով: «ԵԱՏՄ կանոնակարգերը նման հնարավորություն տալիս են, եւ մենք պետք է լիովին օգտվենք դրանից»,- ասաց փոխվարչապետը՝ հավելելով, որ տարբեր պետական գերատեսչությունների, այդ թվում՝ Ազգային անվտանգության ծառայության հետ բավականին երկար քննարկումներից հետո կոնկրետ կարգավորումներ կներկայացվեն այս հարցով: