ԵՏՄ անդամ երկրների ղեկավարների վերջին նիստից հետո սկսել են կարծիքներ հնչել, որ Ռուսաստնը մերժել է Հայաստանի եւ Բելառուսի գազի սակագնի նվազեցման վերաբերյալ առաջարկը: Այո, մեր կողմից առաջարկ է եղել այն մասին, որ գազի տարանցման եւ ուղղակի մատակարարումների գները պետք է միատեսակ լինեն ԵՏՄ բոլոր 5 անդամ երկրների համար: Այս մասին հունիսի 11-ին ՀՀ Ազգային ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկման ժամանակ ասաց փոխվարչապետ Մհեր Գրիգորյանը՝ պատասխանելով պատգամավորների հարցերին:
Ինչպես նշեց փոխվարչապետը, այս առաջարկը մերժվել է:
«Սակայն, եթե ուղիղ ասենք, ռուսական կողմը մերժել է ոչ թե բուն սկզբունքը, այլ այն գաղափարը, որ գինը պետք է հավասար լինի բոլոր 5 երկրների համար: Նրանք ասացին, որ պատրաստ են գինը զիջել 4 երկրի, բայց ոչ 5-ին, քանի որ Ռուսաստանում առանձնահատկություն կա, եւ այն քննարկումը, որը վերաբերում էր Ռուսաստանի նախագահի բարձրաձայնած ավելի խոր ինտեգրմանը, կապված էր սրա հետ: Այսինքն՝ եթե խոսքը այդքան բարձր մակարդակով միասնության մասին է, ապա խոսք պետք է գնա նաեւ ավելի բարձր մակարդակով ինտեգրման մասին: Ինչո՞ւ եմ այս ամենն ասում: Պարզապես մենք պետք է հասկանանք, որ եթե 2019 թվականին կատարվել էր այդպիսի մեծ աշխատանք, ապա տարվա վերջին հանկարծ պարզվեց, որ այդ առաջարկը ուղղակի աջակցություն չստացավ, չի ընդունվում, եւ դրանով ամեն ինչ ավարտվում է»,- ասաց նա:
Ընդ որում՝ Գրիգորյանը հայտնեց, որ իրենք արդեն մի կետով համաձայնագիր ունեն, ըստ որի՝ ռուսական կողմը համաձայնում է, որ գազի տարանցման եւ մատակարարման գինը, ինչը փաստացի կազմում է կապույտ վառելիքի արժեքի 80 տոկոսը, սահմանվելու է միասնական մակարդակի շրջանակում:
«Ես չեմ ասի, թե մենք այս հարցում ինչ դիրքորոշում ունենք: Մենք այդ մասին կխոսենք մի փոքր ավելի ուշ, բայց արդեն պաշտոնական մակարդակով: Բայց բելառուսական կողմը պնդում է, որ գինը պետք է միատեսակ լինի ԵՏՄ բոլոր անդամ երկրների համար: Այսինքն՝ կա՛մ գինը կդառնա բոլորի համար միասնական, կա՛մ Ռուսաստանը լրացուցիչ սուբսիդիաների պատճառով այդ հնարավորությունը կկորցնի»,- պարզաբանեց փոխվարչապետը՝ հույս հայտնելով, որ իրենց կհաջողվի գալ ընդհանուր հայտարարի: