Համոզված եմ, որ ԵԱՏՄ-ն գազի գների համաձայնեցման լավագույն հարթակն է: Այս մասին հունիսի 11-ին մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանը, պատասխանելով պատգամավորների հարցերին, ասաց ՀՀ փոխվարչապետ Մհեր Գրիգորյանը:
Փոխվարչապետի խոսքով՝ սա լավագույն հարթակն է այս հարցում առավել ճիշտ եւ ինստիտուցիոնալ լուծում ստանալու համար, քանի որ ամեն տարի գազի գնի բարձրացումը սահմանին քննարկելը երկկողմանի մակարդակում շատ անհարմար եւ դժվար է:
«Դա ոչ միայն շատ ժամանակ է պահանջում, այլեւ չի ապահովում միջնաժամկետ ապագայի տեսանելիությունը ներդրողների կամ սպառողների համար»,- շեշտեց Գրիգորյանը՝ նշելով, որ այս ամենը որոշակի դժվարություններ է ստեղծում ԵԱՏՄ անդամ երկրներում բիզնեսի համար:
