Կուբան եւ Ուզբեկստանը բանակցություններ են վարում ԵԱՏՄ տարածքում դիտորդի կարգավիճակ ստանալու համար: Այս մասին հունիսի 11-ին մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանն ասաց ՀՀ արտաքին գործերի փոխնախարար Շավարշ Քոչարյանը:
Ըստ նրա՝ այժմ դիտորդի կարգավիճակ ունի միայն Մոլդովան: «Մոլդովայի նախագահ Իգոր Դոդոնը մասնակցում է ԵԱՏՄ Գերագույն խորհրդի նիստերին, բայց միայն՝ բաց մասում: Այդպես էր, օրինակ, Երեւանում: Այսօր բանակցություններ են ընթանում, կարգավիճակ ստանալու դիմումներ կան Կուբայից եւ Ուզբեկստանից»,- պարզաբանեց Քոչարյանը: Ինչպես նշեց փոխնախարարը, Հայաստանը հասել է նրան, որպեսզի թեկնածուների առջեւ լուրջ պայմաններ դրվեն: Դա, նրա խոսքով, բխում է ԵԱՏՄ պայմանագրից:
Այդպես, այն երկրները, որոնք ցանկանում են դիտորդի կարգավիճակ ստանալ, պարտավորվում են չձեռնարկել այնպիսի գործողություններ, որոնք կարող են վնասել Միության որեւէ երկրին:
«Այս պայմանը պատահական չի առաջադրվել: Ժամանակին խոսակցություններ կային մեզ համար անընդունելի երկրների կողմից դիտորդի կարգավիճակ ստանալու հնարավորության մասին, մասնավորապես՝ Ադրբեջանի: Երբ դիմում էր Կուբան, նրանք այս հանգամանքին մատնացույց չարեցին: Մեր պահանջով՝ այն ներառեցին: Ուզբեկստանն իր հայտն ուղղել է արդեն այդ պարտավորությամբ»,- ասաց Քոչարյանը: