Մարդու իրավունքների եվրոպական կոնվենցիայի պահանջն է, որ անգամ համաճարակի ու արտակարգ դրության պայմաններում հարուցվի քրգործ՝ պարզելու համար, թե արդյո՞ք պետությունը իր պարտականությունները կատարել է քաղաքացու հանդեպ՝ երաշխավորելու նրա կյանքի իրավունքը։ Այս մասին այսօր՝ հունիսի 11-ին, ֆեյսբուքյան իր էջում տեղադրված տեսանյութում ասել է հասարակական-քաղաքական գործիչ Սամվել Ֆարմանյանը։
«Գործերը արդեն պետք է հարուցված լինեին, վստահաբար կարող եմ երաշխավորել, որ այդ գործերը հատ առ հատ հարուցվելու են ապագայում, քանի որ այնտեղ կարող է խոսք գնալ նաեւ այդ իրավունքից բխող փոխհատուցման մասին մահացածների հարազատներին։ Տրամաբանական հարց է առաջանում՝ ինչպես կարող է երկրի վարչապետը հայտարարել, որ մարդը մահացել է, քանի որ մահճակալ չի եղել հիվանդանոցում, միեւնույն ժամանակ հարուցված չլինի քրգործ՝ ստուգելու, թե ում մեղքով է ողբերգական նման բան տեղի ունեցել»,- նշել է նա։
Ըստ Ֆարմանյանի՝ Նիկոլ Փաշինյանը բողոքում է, թե հասարակությունը լուրջ չի ընդունում կորոնավիրուսի համաճարակը եւ մեղադրում է ժողովրդին դրա համար առանց հաշվի առնելու, որ ինքը ժողովրդի այդ շերտերի համար վատ օրինակ է ծառայում։
«Երբ դու մի օր հայտարարում ես, որ հիվանդացել ես կորոնավիրուսով և 4-5 օր անց հայտարարում, որ բուժվել ես։ Ի՞նչ է սա, եթե ոչ անլրջության ուղերձ հենց հասարակությանը։ Ուր մնաց քո հանդեպ վստահությունը, եթե հասարակությունն իր մեծամասնությամբ քեզ վստահում է, ապա տրամաբանական հարց չի՞ առաջանում, թե ինչպես է ստացվում, որ այդ հասարակությունը լուրջ չի ընդունում քո հորդորը և դու ստիպված ես դիմելու անընդունելի, սրիկայական մեթոդների՝ հանձնարարելով ոստիկանությանը ժողովրդին ասֆալտին թռելու ու դրանով հպարտանալու»,- ասել է նա։
Ֆարմանյանը նշել է, որ իրավիճակի լուծման տարբերակը Փաշինյանի հրաժարականն է, քանի որ վերջինս կորցրել է ՀՀ հասարակության մեծամասնության աջակցությունը և նոր քաղաքական իրավիճակ է ստեղծել Հայաստանում։
