Ոստիկանները քիչ առաջ ոստիկանության բաժնի մոտից բերման ենթարկեցին այնտեղ հավաքված հասարակական քաղաքական մի շարք գործիչների՝ այդ թվում Արսեն Բաբայանին, Արթուր Դանիելյանին։
Ոստիկանները բարձրախոսով նախ երեք րոպե ժամանակ տվեցին հավաքվածներին, որպեսզի դադադարեցնեն ակցիան, հավաքվածները հրաժարվեցին հեռանալ, ինչից հետո ոստիկանները սկսեցին հավաքվածներին բերման ենթարկել։
Նշենք, որ ոստիկանության մոտ մի քանի տասնյակ քաղաքացիներ են հավաքվել այն բանից հետո, երբ 4 իրավաբանի ոստիկանները ԱԺ-ի մոտից բերման էին ենթարկել։
Ավելի վաղ հայտնել էինք, որ Ազգային ժողովի դիմաց բողոքի ակցիայի ժամանակ բերման էին ենթարկվել Ռուբեն Մելիքյանը, Ռոբերտ Հայրապետյանը, Արմեն Գալստյանը, Բաբկեն Հարությունյանը։ Նրանք պահանջում են արտակարգ դրության պայմաններում թույլ տալ խաղաղ հավաքների անցկացումը։
Իրավաբանները կանգնած էին միմյանցից սոցիալական հեռավորության վրա, անցկացնում էին, իրենց խոսքով, միայնակ ակցիաներ, և ընդգծում, որ չեն խախտում պարետի սահմանած որևէ սահմանափակում։ Այնուամենայնիվ, ոստիկանները պնդեցին, որ դա հավաքների արգելման խախտում է եւ բերման ենթարկեցին նրանց։
Այսօր ԱԺ–ն արտահերթ նիստում քննարկվում է արտակարգ դրությունը մեկ ամսով՝ 30 օրով, երկարաձգելու կառավարության որոշումը։ Իրավաբանները նրանց կոչ էին անում քննարկման ընթացքում ներկայացնել հավաքների սահմանափակումները վերացնելու պահանջ։ Հիշեցնենք, որ ՀՀ-ում արտակարգ դրություն է հաստատվել մարտի 16-ից՝ կորոնավիրուսի համավարակով պայմանավորված եւ ըստ պարետի որոշման՝ այս ընթացքում արգելվում են բոլոր տիպի հավաքները։
Ոստիկանները բերման ենթարկեցին ԱԺ–ի մոտ բողոքի ակցիա իրականացնող իրավաբաններին