Եվրոպական երկրների ազգային կարգավորողների պլրատֆորմը, որին անդամակցում է նաեւ Հայաստանը, զգալի չափով ձեւական բնույթ է կրում, ինչպես, ի դեպ, նաեւ շատ այլ եվրոպական կառույցներ: Այս մասին հունիսի 17-ին Ազգային ժողովի նիստում Հեռուստատեսության եւ ռադիոյի ազգային հանձնաժողովի 2019 թվականի գործունեության մասին հաշվետվության քննարկման ժամանակ ասաց ՀՌԱՀ նախագահ Տիգրան Հակոբյանը՝ պատասխանելով պատգամավորների հարցերին:
Այս կապակցությամբ Հակոբյանը նշեց, որ իրենք փորձել են կազմակերպության գործունեությունն ակտիվացնել՝ ներկայացնելով Ադրբեջանում հեռարձակվող հայատյաց եւ մարդատյաց հաղորդումներ ու ծրագրեր: «Մենք պայմանավորվել ենք, որ գարնանային նստաշրջանում ելույթ ենք ունենալու համապատասխան ներկայացմամբ եւ այդ պլատֆորմին կոչ ենք արել միջնորդ դառնալ Հայաստանի եւ Ադրբեջանի կարգավորողների միջեւ, որ նվազեցվեն լրատվամիջոցներում հակահայկական կամ հակաադրբեջանական, իսկ ես դա չեմ բացառում, քարոզչությունը: Այսինքն՝ իմ կարծիքով, մենք այդ կառույցում շատ ակտիվ աշխատանք ենք սկսել»,- նշեց Հայաստանի ՀՌԱՀ ղեկավարը:
