Եթե իշխանություններն այլեւս ի վիճակի չեն ընկալել հասարակության խնդիրները եւ պիտակավորում են ժողովրդին, ապա նրանց պետք է հնարավորինս շուտ տուն ուղարկել: Այս մասին հունիսի 17-ին «Քաղտնտեսության» հետազոտության ինստիտուտի կողմից կազմակերպված քննարկմանն ասաց ՀՅԴ Դաշնակցության անդամ Արծվիկ Մինասյանը:
Ըստ նրա՝ երկիրը չի կարող զարգանալ, եթե իշխանությունների պահվածքը չփոխվի, եւ նրանց քաղաքականությունը լղոզված բնույթ է կրելու: «Արտակարգ դրության երկարաձգման հարցը քննարկելիս նախորդ որոշումների սխալների վերլուծություն չի արվել, ոչ ոք պատասխանատվության չի ենթարկվել, իսկ առանց դրա անհնար է հետագայում խուսափել սխալներից: Փոխարենը մենք տեսնում ենք, թե ինչպես են իշխանությունները շեղում հասարակությունը հիմնական խնդիրներից, զանգվածաբար ոտնահարում են քաղաքական իրավունքները եւ ոչնչացնում են երկրի քաղաքական համակարգը»,- նշեց նա:
Քաղաքական գործիչը պարզաբանեց, որ եթե բոլոր ռեսուրսների 30-40 տոկոսը ծախսվեր ժամանակին եւ նպատակային, ապա այսօր հնարավոր կլիներ ավելի քիչ գումար ծախսել, իսկ այժմ Կառավարությունն ավելի շատ է ծախսում, սակայն արդյունավետության հասնել գրեթե անհնար է: «Պետք էր ավելի գրագետ քաղաքականություն իրականացնել ծախսերը նվազեցնելու եւ եկամտի նոր աղբյուրներ ներգրավելու համար՝ վարկերի մարման պայմանները երկարաձգելու վերաբերյալ Համաշխարհային բանկի եւ Արժույթի միջազգային հիմնադրամի հետ բանակցությունների միջոցով: Բացի այդ, ֆերմերներին օգնություն է հատկացվել բանկերի միջոցով, որոնցից նրանք կախված են արդեն 80-90 տոկոսով, այսինքն, ամրապնդվել է միայն բանկային համակարգը, այլ ոչ թե գյուղատնտեսությունը»,- եզրափակեց Արծվիկ Մինասյանը:
