Ես ողջունում եմ ԵՄ-ի պաշտպանական ջանքերը, սակայն դրանք չեն կարող փոխարինել ՆԱՏՕ-ին։ Այս մասին Euronews-ին տված հարցազրույցում հայտարարել է ՆԱՏՕ-ի գլխավոր քարտուղար Յենս Սթոլթենբերգը՝ պատասխանելով այն հարցին, թե չի եկել արդյոք այն պահը, երբ ՆԱՏՕ-ն մի կողմ կքաշվի, իսկ Եվրոպան, հակառակը, խաղի մեջ կմտնի իր բանակով եւ իր հնարավորություններով՝ հետ մղելով նոր սպառնալիքները։
«Մենք պետք է հիշենք, որ ՆԱՏՕ-ի պաշտպանական ծախսերի 80%-ը ապահովում են ԵՄ-ի մեջ չմտնող դաշնակիցները: Այնպես որ, աջակցելով Եվրամիության ջանքերին, չմոռանանք, որ ՆԱՏՕ-ի երկրների բնակչության 60%-ը ապրում է ԵՄ-ի կազմում չընդգրկված երկրներում: Այնպես որ, Եվրամիությունը չի կարող փոխարինել ՆԱՏՕ-ին, սակայն ՆԱՏՕ-ն եւ Եվրոպան կարող են լրացնել միմյանց: Եվ մենք միայն կողմ ենք պաշտպանական ոլորտում Եվրամիության նոր ջանքերին»,- նշել է նա:
