Իշխանությունը շարունակում է տեղեկատվական լկտի գրոհները։ Այս մասին այսօր՝ հունիսի 18–ին, ԱԺ–ում լրագրողների հետ ճեպազրույցում ասաց ԱԺ «Բարգավաճ Հայաստան» խմբակցության քարտուղար Արման Աբովյանը՝ անդրադառնալով լրագրողի այն դիտարկմանը, որ համացանցում ակտիվորեն տարածվում է տեսանյութ, որ ԲՀԿ–ականներն իրենց կուսակցության անդամատոմսերը գետն են նետել։
«Սա նորմալ կոնտեքստի մեջ է մտնում, ընդ որում գիտեք՝ այն գրքերը որով աշխատում են, այն ցուցումները, որ իրենք ստանում են այնքան կանխատեսելի էին, որ մեկնաբանելու թեմա էլ չկա։ Սա կոշտ վարկաբեկման տրամաբանության մեջ է, որն այսօր իշխանություններն իրականացնում են, որովհետեւ տարբերակ չունեն եւ պետք է ինչ որ մի ձեւ քողարկեն քաղաքական հետապնդումները»,– ասաց նա։
Լրագրողի հարցին, այս օրերին եղե՞լ են մարդիկ, որ ԲՀԿ անդամակցությունից հրաժարվել են, Աբովյանը պատասխանեց. «Ես տեղեկություն չունեմ. ասեմ ավելին, միայն այս օրերի ընթացքում 4000–ից ավելի մարդ դիմել է, որ ընդգրկվի ԲՀԿ–ում։ Մարդիկ զանգում են, դիմում են, գալիս են, փորձում են ինչ որ մի ձեւ աջակցել, որովհետեւ այն ինչ այսօր կատարվում է ԲՀԿ–ի շուրջ, դա ոչ միայն նեղ կուսակցական կամ պարոն Ծառուկյանին վերաբերվող խնդիր է, դա պետական խնդիր է, որովհետեւ այն ճանապարհը, որ այսօր ընտրել է իշխանությունը տանում են ոչ թե դեպի անդունդ, այլ տանում են դեպի կոլապս։ Եթե մենք նախկինում ունեինք տնտեսական, սոցիալական եւ այլ ոլորտներում տարբեր խնդիրներ, ապա այսօր մենք ակնհայտ ունենք քաղաքական ճգնաժամ եւ միակ մեղավորը իշխանություններն են»։
