Ուղղաթիռի օդաչուն, որի կործանման հետեւանքով զոհվել էին բասկետբոլիստ Քոբի Բրայանթը, նրա դուստրը եւ եւս 7 մարդ, կարող էր ապակողմնորոշվել մառախուղի պատճառով: Այսպիսի մանրամասներ է ներկայացրել Reuters-ը՝ վկայակոչելով Տրանսպորտի անվտանգության հարցերով ազգային խորհրդի (NTSB) զեկույցը:
Փաստաթղթում է նշվում է, որ օդաչու Արա Զոբայանը աղետից կարճ ժամանակ առաջ կարգավարներին ասել է, որ ուղղաթիռը բարձրություն է հավաքում, չնայած իրականում այն իջնում եր: Զեկույցում նշված է, որ օդաչուն կարող էր շփոթվել, քանի որ երկինքը եւ շրջակայքի համայնապատկերը չէր տեսնում, ինչի պատճառով կարող էր առաջանալ «տարածական ապակողմնորոշում»: NTSB-ն, սակայն, դեռեւս չի թողարկել աղետի տվյալների վերաբերյալ վերջնական զեկույցը:
Բրայանթը զոհվել է հունվարի 26-ին անձնական ուղղաթիռի կործանման հետեւանքով: Նա 13-ամյա դստեր՝ Ջիանայի հետ ուղեւորովում էր պատանեկան բասկետբոլային հանդիպմանը: Ինը ուղեւորներից ոչ մեկը ողջ չէր մնացել: Բրայանթը թռիչք էր իրականացնում Sikorsky S-76B ուղղաթիռով, որն աշխարհում ամենաանվտանգներից մեկն է համարվում: Այդ ժամանակ տեղանքի վրա խիտ մառախուղ էր գոյացել: Island Express ուղղաթիռային ընկերությունը, որի ուղղաթիռն էր կործանվել, հրաժարվել է ստանձնել աղետի պատասխանատվությունը: Ընկերության փաստաբանները նշել են, որ աղետի պատճառը անկանխատեսելի հանգամանքներն էին, որոնք չէին կարող կանխել: