Մոտ ժամանակներս կկրճատվեն «Գազպրոմ Արմենիա»-ի 1000 աշխատակիցներ: Այս մասին հայտարարեց ընկերության գործադիր տնօրեն Հրանտ Թադեւոսյանը:

Նրա խոսքով՝ կրճատումների տակ է հայտնվում ամբողջ ապարատը, այդ թվում նաեւ վարորդները:

«Ես առաջարկել եմ կրճատել իմ աշխատավարձը: Բացի այդ, պատրաստվում եմ կրճատել ղեկավար կազմի՝ 10 մարդու, աշխատավարձերը»,-հավելեց նա:  

Նշենք, որ սպառողներին վաճառվող գազի միջին գինը, ըստ ՀԾԿՀ առաջարկի, նախատեսված է 266,71 դոլարի չափով, ներառյալ՝ 44,45 դոլար ԱԱՀ-ն, Ռուսաստանից գազի ներմուծման ծախսերը՝ 165 դոլար, սահմանից սպառողին գազի մատակարարման ծախսերը՝ 9,37 դոլար, ընկերության մարժան՝ 47,89 դոլար:

Հանձնաժողովի բաժանորդ ռեզիդենտների համար թողնել անփոփոխ՝ 1000 խորանարդ մետրի համար 139 հազար դրամ, իսկ սոցիալապես խոցելի խմբերի համար՝ 100 հազար դրամ:

Ջերմային տնտեսությունների համար գազի սակագինն առաջարկվում է բարձրացնել 212-ից 224 դոլար: Ջերմային էլեկտրակայաններում վաճառվող բնական գազի գինը մնում է նույնը՝ 139 հազար դրամ: Ամսական ավելի քան 10 հազար խորանարդ մետր գազ օգտագործած սպառողների համար գինը կսահմանվի 255,91 դոլարի չափով:

Որոշումն ուժի մեջ է մտնում հունիսի 19-ից, ջերմաէլեկտրակայանների համար՝ օգոստոսի 1-ից: 

Հունիսի 19-ին «Գազպրոմ Արմենիա»-ն առաջարկել է հավելյալ քննարկումներ անցկացնել եւ սակագինը բարձրացնել մինչեւ 275 դոլար: