Եվրամիության պետությունների եւ կառավարությունների ղեկավարներն առցանց գագաթնաժողովին որոշում են կայացրել վեց ամսով երկարաձգել տնտեսական պատժամիջոցները Ռուսաստանի նկատմամբ, որի վերժնաժամկետն ավարտվում է հուլիսի 31-ին: Այս մասին ՏԱՍՍ-ին հայտնել է աղբյուրը համայնքի երկրներից մեկի պատվիրակությունում:
«Առաջնորդները համաձայնել են երկարաձգել պատժամիջոցները եւս վեց ամսով»,- ասել է նա:
Դիվանագետի խոսքով՝ այս որոշումը կայացվել է այն բանից հետո, երբ Գերմանիայի կանցլեր Անգելա Մերկելը եւ Ֆրանսիայի նախագահ Էմանուել Մակրոնը մյուս առաջնորդներին տեղեկացրեցին Ուկրաինայում հակամարտության կարգավորման Մինսկի համաձայնագրերի իրականացման ընթացքի մասին: «Ինչպես գիտեք, Ռուսաստանի դեմ սահմանափակող միջոցները կապված են Մինսկի համաձայնագրերի իրականացման հետ: Ղեկավարները եկել են այն եզրակացության, որ այս գործընթացում ոչ մի էական առաջընթաց չկա, ուստի որոշվեց երկարաձգել պատժամիջոցները», - պարզաբանեց նա:
2014-ին Եվրամիությունը պատժամիջոցներ էր սահմանել Ռուսաստանի Դաշնության դեմ՝ Ուկրաինայում իրադարձությունների եւ Ռուսաստանի՝ Ղրիմի հետ վերամիավորման կապակցությամբ: Սահմանափակող միջոցառումները բազմիցս ընդլայնվել եւ երկարաձգվել են: Առանց վիզայի ռեժիմի եւ համագործակցության նոր հիմնական համաձայնագրի շուրջ բանակցությունները դադարեցվել էին, ԵՄ երկրներ մուտքի արգելք էր սահմանվել Ռուսաստանի Դաշնության պաշտոնատար անձանց համար, նրանց ակտիվները սառեցվել էին, առեւտրային, ֆինանսական եւ ռազմական բնույթի սահմանափակումներ էին ներդրվել: Ի պատասխան՝ Ռուսաստանն արգելել էր մի շարք պարենային ապրանքների ներմուծումը ԵՄ երկրներից: