ՆԱՏՕ-ն ողջունում է Ռուսաստանի եւ ԱՄՆ-ի միջեւ սպառազինությունների վերահսկման բանակցությունները Վիեննայում եւ հանդես է գալիս Ռազմավարական հարձակողական սպառազինությունների հետագա կրճատման ու սահմանափակման միջոցառումների մասին պայմանագրի երկարաձգման աջակցության օգտին։ Այս մասին երեքշաբթի օրը հայտարարել է ՆԱՏՕ-ի գլխավոր քարտուղար Յենս Սթոլթենբերգը՝ ելույթ ունենալով Բրյուսելում գտնվող Միացյալ Նահանգների Մարշալի գերմանական հիմնադրամում, հայտնում է ՏԱՍՍ-ը:
Նա նաեւ սատարել է Չինաստանին բանակցային գործընթացում ներգրավելու գաղափարը։
«Այն փաստը, որ Ռուսաստանը եւ ԱՄՆ-ը նստել են բանակցությունների սեղանի շուրջ եւ խորհրդակցություններ են անցկացնում զենքի վերահսկման վերաբերյալ, հսկայական նշանակություն ունի ՆԱՏՕ-ի եւ ամբողջ աշխարհի անվտանգության համար, մենք ողջունում ենք դա: Իհարկե, շատ կարեւոր է, որ Չինաստանը եւս միանա այս քննարկմանը»,- ասել է Սթոլթենբերգը: «Նույնիսկ եթե Չինաստանը չմիանա պայմանագրի հարցով բանակցություններին, ես կարծում եմ, որ դրա երկարաձգումը ճիշտ որոշում կլինի»,- ընդգծել է գլխավոր քարտուղարը:
Նա նաեւ նշել է, որ թեեւ սա Ռուսաստանի եւ ԱՄՆ-ի միջեւ երկկողմ պայմանագիր է, որի հետ ՆԱՏՕ-ի պետությունները անմիջական կապ չունեն, Վաշինգտոնը ակտիվորեն խորհրդակցում է դաշինքի երկրների հետ`այս պայմանագրին առնչվող խնդիրների եւ ընդհանրապես զենքի վերահսկման շուրջ:
Հունիսի 22-ին Վիեննայում փակ դռների հետեւում տեղի են ունեցել ռուս-ամերիկյան խորհրդակցություններ՝ ռազմավարական կայունության եւ սպառազինությունների վերահսկման վերաբերյալ: Ռուսական պատվիրակությունը ղեկավարել է ՌԴ արտաքին գործերի նախարարի տեղակալ Սերգեյ Ռյաբկովը, ամերիկյանը՝ սպառազինությունների վերահսկման հարցերով ԱՄՆ նախագահի հատուկ ներկայացուցիչ Մարշալ Բիլինգսլին: Կողմերը նաեւ քննարկել են պայմանագրի երկարաձգման հարցը:
Այս պայմանագիրը ստորագրվել է Ռուսաստանի եւ ԱՄՆ-ի կողմից՝ 2010 թվականին: Այն ուժի մեջ է մնում 10 տարվա ընթացքում (մինչեւ 2021թ. փետրվարի 5-ը), եթե մինչ այդ չփոխարինվի հետագա համաձայնագրով: Փաստաթուղթը կարող է երկարաձգվել ոչ ավելի, քան հինգ տարով, այսինքն մինչեւ 2026 թվականը՝ կողմերի փոխադարձ համաձայնությամբ: Մոսկվան կոչ է անում Վաշինգտոնին չձգձգել պայմանագիրը երկարաձգելու հարցի լուծումը եւ այն բնութագրում է որպես ապառազմականացման ոլորտում «ոսկե ստանդարտ»: