Ազգային ժողովում սահմանադրական փոփոխության օրենքի ընդունումից հետո, որն ի դեպ, չի ուղարկվելու հանրապետության նախագահի հաստատմանը, օրվա հարցն էր՝  խորհրդարանական ընդդիմությունը կհավաքի բավարար թվով ստորագրություն՝ այդ օրենքը Սահմանադրական դատարանում վիճարկելու համար, թե ոչ: Իսկ մինչեւ այդ, այսօր լրագրողներն առավոտյան հասցրել են զրուցել բարձր ատյանի երեք դատավորի հետ: Սահմանադրական դատարանի նախագահը որպես իրավաբան երեկ խորհրդարանում տեղի ունեցածի համար ամոթի զգացողություն ունի: «Ուզում եմ հավատալ մեր պատգամավորներին, որ այս փոփոխություններից հետո նրանք բոլորը երջանիկ են ապրելու», ակնհայտ հեգնանքով նշել է Հրայր Թովմասյանը:

«Կա իրավական սկզբունք՝ առոչինչ իրավական ակտերին անձի ոչ թե  իրավունքն է դրանց ենթարկվել կամ չենթարկվելը, այլ ինքը իրավունք չունի դրանց ենթարկվել»,-ընդգծել է Հրայր Թովմասյանը:  Հարցին՝ տհաճ չէ՞ աշխատել գործող իշխանության հետ, որն անընդհատ ասում է, թե Թովմասյանը լեգիտիմ չէ, պետք է հեռանա, նա պատասխանել է. «Իրենց ասածները Հրայր Թովմասյանի համար 100-րդական են: Հրայր Թովմասյանը գլուխը կախ, գալիս իր աշխատանքն անում, գնում է»:

Չի կարելի իրիկունը քնել ու առավոտյան զարթնել, ասել՝ դու էլ դատավոր չես, կարծում է Սահմանադրական դատարանի անդամ Ֆելիքս Թոխյանը։ Շահերի բախման վերաբերյալ դիտարկմանն ի պատասխան Թոխյանը հորդորել է  ծանոթանալ Վենետիկի հանձնաժողովի եզրակացությանը:  Սահմանադրական դատարանի անդամին փոքր ինչ շփոթեցնում է հանգամանքը, որ այս դեպքում ինքը պետք է իր շահերը պաշտպանի: Ֆելիքս Թոխյանի ձեւակերպմամբ՝ Ազգային ժոովում եղել է հերյուրանք ելույթ, թե իբր շտապ նիստ են արել երկրորդ նախագահի գործը մտցրել են. «Ամոթ է, ամոթ։ Վենետիկցիների որոշումը ստացել ենք ուրբաթ։ Պետք է վերաբացեք, սկսենք քննությունը, այսինքն՝ այն հիմքը, որով կասեցրել ենք, վերացել է։ Իսկ մեզ ասում են՝ ափալ-թափալ։ Հուլիսի 7-ին ենք նշանակել, թեեւ կարող էինք ավելի շուտ նշանակել, եթե հետին մտքեր ունենայինք», ասել է նա։

Բարձր ատյանի անդամ Ալվինա Գյուլումյանը պնդում է, որ փոփոխությունն իրեն վերաբերել չի կարող, որովհետեւ ինքը պաշտոնավարում է 2014-ից. Իսկ Ազգային ժողովի որոշմամբ՝  12 տարուց ավելի անընդմեջ պաշտոնավարած ՍԴ անդամների լիազորություններն են դադարեցվում: Ըստ նրա՝ այն դատավորները, որոնց լիազորություններն այս փոփոխություններով դադարեցվում են, կարող են վարչական կարգով բողոքարկել:

Իսկ «Լուսավոր Հայաստանի» ու «Բարգավաճ Հայաստանի» միջեւ քննարկումները շարունակվում են. Հիշեցնեմ, որ ԲՀԿ-ին երկու ստորագրություն չի բավարարում Սահմանադրական դատարան դիմելու համար: Ըստ ԼՀԿ-ի՝ Մայր օրենքը հնարավորություն չի տալիս ԱԺ պատգամավորներին այդ հարցով դիմել Սահմանադրական Դատարան: «Քննարկումների մեջ ենք, մի քանի տեսակի դիմումներ կան, որոնք կարող են կայացվել: Այս պահին որեւէ նորություն չունեմ», ասել  է Էդմոն Մարուքյանը, նաեւ անդրադարձել երեկ հապճեպ ընդունված որոշմանը:

Սահմանադրական դատարանի որոշումը կարող է ազդել Ռոբերտ Քոչարյանի դեմ հարուցված գործի վրա, լրագրողների հետ զրույցում ասել է երկրորդ նախագահի փաստաբան Հայկ Ալումյանը:

Իսկ Ռոբերտ Քոչարյանի ու մյուսների գործով դատավարությանը Բանակի գլխավոր շտաբի նախկին պետ Յուրի Խաչատուրովի փաստաբան Միհրան Պողոսյանը միջնորդություն է ներկայացրել նիստը հետաձգելու վերաբերյալ: Պողոսյանը դատարանին հաղորդում է տվել, որ նախօրեին շփվել է կորոնավիրուսով վարակվածի հետ եւ պետք է թեստ հանձնի: Հաջորդ նիստը տեղի կունենա հունիսի 30-ին: Նշենք, որ նիստին ներկա էր նաեւ երկրորդ նախագահը:

Ազգային ժողովի փոխնախագահ Վահե Էնֆիաջյանը վարակվել է կորոնավիրուսով։ Նա այդ մասին տեղեկացրել է Ֆեյսբուքի իր էջում։ «Ինքնազգացողությունս լավ է, այս պահին որեւէ անհանգստացնող գանգատ չունեմ»,- գրել է նա։

Հայաստանում անցած մեկ օրում մահացել է կորոնավիրուսով վարակված եւս 21 մարդ: Առավոտվա դրությամբ COVID-19-ով վարակվելու 418 նոր դեպք է գրանցվել, ընդհանուր թիվը հասել է 21006-ի: Վիրուսից մահացել է 12 մարդ, մահացածների թիվն այդպիսով հասել է 372-ի: Նախորդ օրը գրանցվել է մահվան եւս 9 դեպք, երբ մարդն ունեցել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 126 է:

Ազգային Ժողովի նախկին նախագահ, բժշկական գիտությունների դոկտոր, պրոֆեսոր Արա Բաբլոյանը կարծում է, որ առնվազն 10-15 օրից կնկատենք թվերի նվազում։ Ըստ նրա՝ իրականացվող միջոցառումները պետք է լինեն շարունակական։ «Եթե շարունակական պահենք ռեժիմը, կարող ենք հաղթահարել առնվազն 2 ամսից, ոչ լրիվ բայց նվազեցնենք թիվը»,- ասել է նա։

ԱՄՆ դոլարի փոխարժեքը նախորդ օրվա համեմատ աճել է 0.44 դամով ու հասել 479.43 դրամի: Եվրոյի փոխարժեքն աճել է 4.04 դրամով ու կազմել  541.13 դրամ, բրիտանական ֆունտի փոխարժեքն աճել է 2.51 դրամով ու հասել  596.55 դրամի, իսկ ռուսական ռուբլու փոխարժեքն աճել է 0.07 դրամով ու կազմել  6.97 դրամ։

Հունիսի 24-ին սպասվում է առանց տեղումների եղանակ: Օդի ջերմաստիճանը մի փոքր կբարձրանա: Երեւանում եւս տեղումներ չեն լինի: Առաջիկա գիշերը մայրաքաղաքում կլինի +18 +20, վաղը ցերեկը՝ +33 +35: