Երբ ունեինք նորմալ կանոնակարգ, բյուջեյի կատարողականը, եթե չէր հաստատվում, կառավարությունը ցրվում էր: Հիմա նման բան չկա, ինչպես անցած տարի, այս տարի ևս այն կարևոր քննարկում չդարձավ, այս տարի այն քննարկում ենք 2 խմբակցությունով: Այս մասին այսօր հունիսի 25-ին՝ ասաց «Լուսավոր Հայաստան» խմբակցության պատգամավոր Էդմոն Մարուքյանը` ԱԺ–ում 2019 թվականի բյուջեի կատարողականի քննարկման ժամանակ խոսելով խմբակցության անունից։
Նրա խոսքով՝ քաղաքական առումով իշխանություններին հետաքրքիր չէ, երբ ընդդիմադիր որևէ ֆրակցիա բոյկոտում է:
«Պարո´ն Պապիկյան, երբ ասում ենք՝ թերակատարվել է բյուջեն, դա միայն ճանապարհաշինությանը չի վերաբերում: Եվ այս առումով ամբողջ բեռը կամ մեղքը բարդել տարածքային կառավարման վրա չի կարելի:
Ամբողջ կառավարությանն է դա վերաբերվում:
Ուզում եմ ժողովրդին բացատրել` ինչ է նշանակում բյուջեն թերակատարվել է:
Այսինքն ժողովուրդը փողը հավաքել, հարկերը տվել է, տնտեսական ակտիվություն է ցուցաբերել, գումարը հավաքել, բերել տվել է այս հրաշալի մարդկանց, ու այս մարդիկ չեն ծախսել այդ փողը:
Թերակատարումը սա է, այսինքն գումարը հավաքվել է, ծրագրավորված է եղել, հիմա ունենք ծրագրեր, որի կատարումը 0 է, ունենք ծրագրեր էլ, որ 20 տոկոս է կատարումը»,- ասաց Էդմոն Մարուքյանը:
Նրա խոսքով՝ կառավարությունը չի կարողացել անել այնպես, որ ժողովրդի տված փողերը, որով բյուջեն է լցվում, ծառայի ժողովրդի նորմալ ապրելուն, և իշխանությունը ձախողել է դա.
«Խոսում ենք, որ 2019-ը թվականը լավ տարի է եղել, ինչի մասին մենք էլ ենք ասել, ոչ ոք դա չի առարկում, բայց այդ ակտիվ, լավ տարում ժողովուրդը փողերը հավաքել բերել տվել է ձեզ, դուք այդ փողը չեք կարողացել էնպես ծախսել ժողովրդի համար, որ նրանց համար ավելի լավ լինի այս տարի:
Հիմա Հայաստանը գտնվում է խորը ճգնաժամի մեջ` առողջապահական ճգնաժամ, սոցիալական ճգնաժամ, դրան գումարած տնտեսական, ինչպես նաև քաղաքական:
Մեր գործընկերներն ասում են՝ ընդդիմադիրներ կան՝ բայղուշություն են անում:
Ի՞նչ եմ ուզում ասել` հիմա վատ է իրավիճակը, ապագայում ավելի վատ կլինի, որովհետև բոլոր ցուցանիշները դա են ցույց տալիս` տնտեսական, սոցիալական, քաղաքական առումով էլ վատ ցուցանիշ են ցույց տալիս:
Իսկ ի՞նչ է անում իշխանությունն այդ ընթացքում: Անում է ամեն ինչ, որ լռեցնի ընդդիմախոսներին`փոխանակ անի այնպես, որ տնտեսությունը զարգանա, սոցիալական երաշխիքներ լինեն, մարդկանց կյանքերը բարելավվեն, բայց նրանց կյանքը գնալով վատանում է, իսկ իշխանությունը շրջվել ու զբաղվում է ընդդիմախոսներով»,- նշեց պատգամավորը:
Ըստ պատգամավորի` քաղաքական մեծամասնությունը այդ ընթացքում իր ժամանակին տված խոստումները, որոնք չի կարողանում իրականացնել իրավական հստակ ճանապարհներով, իրականացնում է բոլոր եղած չափանիշներին, սահմանադրության էթիկայի կանոնակարգերի և այլնի խախտումների միջոցով:
«Բայց հիմա էլ խնդիր կա, քաղաքական պատասխանատվության հարց կա: Երբ որ փող կար` ինչո՞ւ չի ծախսվել, ինչո՞ւ չեն կարողացել աշխատել և ովքե՞ր չեն կարողացել աշխատել, բնականաբար նրանց պետք է վերանայել, իսկ դրա փոխարեն զբաղված եք ձեր ընդդիմախոսներին լռեցնելով:
Ինձ վրա հարձակվում եք, մյուս ֆրակցիայի ղեկավարի նկատմամբ գործ է հարուցվում, 87 հոգի քվեարկում են, գնում է,, դատարանը բաց է թողնում, սա է վերջին շրջանի ձեր արածները, դուք զբաղված եք քաղաքական ընդդիմախոսությունը ճնշելու, ընդդիմադիր թերթերին ճնշելու, լռեցնելու գործով»,- ընդգծեց Էդմոն Մարուքյանը:
Մարուքյանն անդրադարձավ նաև «Հրապարակ» թերթի լրագրող Էդիկ Անդրեասյանը դատախազի գրության հիման վրա Ոստիկանության քրեական հետախուզության վարչություն հրավիրելուն։
«Մի հատ հոդված է գրել վարչապետի մասին»,-նշեց նա։
Մարուքյանը նկատեց, որ ՏՄՊՊՀ-ն Հայաստանի պատմության մեջ առաջին անգամ թերթերին հարցաշար է ուղարկում և ասում՝ տվեք ձեր կոմերցիոն գաղտնիքները՝ ի՞նչ գովազդներ եք տալիս, ինչքա՞ն եք տալիս, ո՞նց եք տալիս։
«Մտել է այդ դաշտ։ Բոլոր խնդիրները թողած՝ ՏՄՊՊՀ-ն զբաղված է թերթերով, ում ասենք, ծիծաղի առիթ կտանք։
«Պարոն վարչապետ, երբ եղել եք խմբագիր, ՏՄՊՊՀ-ն դիմե՞լ է Ձեզ, կամ ասե՞լ է՝ գովազդը քանի դրամով եք դնում։ Կամ լրագրողին կանչում են հարցաքննելու, որ իմանան՝ հոդվածում այսինչը գրելով ինչ է նկատի ունեցել... այս ի՞նչ մշակույթ եք բերել։ Անդադար ելույթ եք ունենում, թե լրագրող եք եղել, ո՞նց կարող եք հիմա լրագրողի իրավունքները ոտնահարել, բա հիմա ինչո՞ւ եք լռում։ Հետաքրքիր է, ՏՄՊՊՀ-ն իշխանությանը գիշեր-ցերեկ ծառայող կայքերին է՞լ է դիմել»,- նշեց Էդմոն Մարուքյանը։
