Արժույթի միջազգային հիմնադրամի հունվարյան կանխատեսման համաձայն, 2020-ին համաշխարհային տնտեսությունը պետք է աճեր 3,3%-ով։ Սակայն արդեն ապրիլյան կանխատեսումներում ԱՄՀ-ն ներկայացրել է, թե որքան հիվանդագին կլինի կորոնավիրուսի համաճարակի ազդեցությունը տնտեսության վրա։ Այս մասին այսօր Ազգային ժողովի արտահերթ նիստում Կենտրոնական բանկի 2019թ․ գործունեության տարեկան հաշվետվության քննարկման ժամանակ հայտարարեց ԿԲ նախագահ Մարտին Գալստյանը։

Ինչպես նշեց ԿԲ ղեկավարը, ԱՄՀ կանխատեսումների համաձայն, 2020-ին տնտեսական անկումը կանխատեսվում է 4,9%-ի մակարդակով։

ԿԲ նախագահը ասաց նաեւ, որ իրենց գնահատականներով՝ Հայաստանի տնտեսական աճը 2020թ․ բացասական կլինի՝ նախկին կանխատեսումներից զգալիորեն ցածր։

«Առավել տուժած ոլորտները կլինեն հյուրանոցային բիզնեսը, հասարակական սնունդը, զբոսաշրջային գործակալությունները, տրանսպորտը, սպասարկման ոլորտները, շինարաությունը։ Ընդ որում, գյուղատնտեսության վրա ճգնաժամը գործնականում չի ազդի»,- ընդգծեց Գալստյանը։

ԿԲ ղեկավարի գնահատականներով՝ Հայաստանում տեղի կունենա մասնավոր ներդրումների եւ սպառման կրճատում։

Նա ընդգծեց, որ ստեղծված իրրավիճակում Կենտրոնական բանկի հիմնական գործառույթը ինֆլյացիայի կանխումն է, որն իրենց, ի դեպ, հաջողվել է ապահովել։

«Մայիսի տվյալներով՝ ինֆլյացիան 12 ամիսների ընթացքում կազմել է 1,2%»,- ասաց Գալստյանը։