Հունիսի 22-ին, ժամը 12.30-ի սահմաններում, բժշկական կենտրոնից ոստիկանության Նոր Նորքի բաժնում հաղորդում ստացվեց, որ որովայնի կտրած-ծակած, թափանցող վերքով 41-ամյա մի տղամարդ է բուժօգնության տեղափոխվել:

Նրան դանակահարել էին:

Հետաքննություն իրականացնող մարմինը բացահայտման ուղղությամբ տարաբնույթ միջոցառումներ ձեռնարկեց` հիվանդանոցում համապատասխան արձանագրություններ կազմելուց մինչեւ օպերատիվ հարցումներ: Իրավապահների հետեւողական աշխատանքի շնորհիվ հաղորդումից ժամեր անց կասկածյալը հայտնաբերվեց:

Քրեական հետախույզները տեղեկություններ ստացան, որ Նոր Նորքի 5-րդ զանգվածի խանութներից մեկի մոտ, անձնական հարցերի շուրջ ծագած վիճաբանության ժամանակ, տուժողին դանակահարել է Լյուքսեմբուրգի փողոցի 38-ամյա մի բնակիչ:

Իրավապահների բացատրական աշխատանքի շնորհիվ նույն օրը, ժամը 15.30-ի սահմաններում, կասկածվողը ներկայացավ ոստիկանության Նոր Նորքի բաժին:

Նշանակվել է դատաբժշկական փորձաքննություն:

Հանգամանքները պարզվում են:

Քննությունը շարունակվում է: