ՄԱԿ մարդու իրավունքների հարցերով գերագույն հանձնակատար Միշել Բաչելետը հայտարարել է, որ օկուպացված Արեւմտյան ափի հատվածների անեքսիա սկսելու Իսրայելի ծրագիրը տարածաշրջանի համար «աղետալի» հետեւանքներ կունենա, փոխանցում է AP-ն:
ՄԱԿ գլխավոր քարտուղարը, Եվրամիությունը եւ առանցքային արաբական երկրները անեքսիայի դեմ են հանդես եկել՝ հայտարարելով, որ դա կխախտի միջազգային իրավունքը եւ կկործանի Իսրայելի կողքին Պաղեստինի կենսունակ պետություն ստեղծելու մնացած բոլոր հույսերը:
«Անեքսիայի ստույգ հետեւանքները անհնար է կանխատեսել»,- ասել է Բաչելետը: «Բայց դրանք, հավանաբար, աղետալի կլինեն պաղեստինցիների համար, իր՝ Իսրայելի համար եւ տարածաշրջանի համար»: Բաչելետը նախազգուշացրել է, որ նույնիսկ ոչ մեծ անեքսիան կստեղծի «անչափ պայթյունավտանգ խառնուրդ»: