Ես այդ հարցը քննարկել եմ նաեւ ՀՀ-ում ՌԴ դեսպանի հետ. որպեսզի պարզ լինի՝ ինչի մասին է խոսքը, ասեմ, որ գոյություն ունի մուլտիպլեքս համակարգ, որի ծածկույթը ՀՀ ամենափոքր մասն է, մի քանի տոկոս է կազմում. դա այն վայրերն են, որտեղ գոյություն չունեն օրինակ «Յուքոմի» ցանցը, «Ռոստելեկոմի» ցանցը, ինտերնետային հեռուստատեսային ցանցը: Այս մասին այսօր՝ հունիսի 30-ին, ԱԺ-ում լրագրողների հետ զրույցում նշեց ԱԺ փոխխոսնակ Ալեն Սիմոնյանը՝ անդրադառնալով ռուսական հետռուստաալիքիների հետ կապված խնդրին, որը բարձրաձայնել էր նաեւ Հայաստանում ՌԴ դեսպանությունը:
«Մուլտիպլեքս համակարգերում ներառված են եղել այնպիսի հեռուստաալիքներ, ինչպիսիք են CNN-ը եւ ռուսական 2-3 ալիքները: Ընդհանրապես աշխարհում մուլտիպլեքսներում չկան ներառված այլ երկրների, նույնիսկ դաշնակից երկրների ալիքները: Դա նոնսենս է, որ մուլտիպլեքսը ներառում է օտարալեզու որեւէ հեռուստաալիք:
Այդ համագործակցությունը երկկողմանի պետք է լինի. այսինքն եթե ինչ-որ հեռուստաալիքի մասին ենք խոսում, որը ցանկալի է, որ մուլտիպլեքսում ներառված լինի, նաեւ ցանկություն եւ պատրաստակամություն պետք է լինի այդ ալիքի կողմից: Այս պահին բանակցություններ են գնում, ԱԳՆ-ն զբաղվում է, որ այնուամենայնիվ ռուսական ВГТРК-ի ալիքները ներառվեն հայկական մուլտիպլեքսի մեջ»,-ասաց նա: