ՍԴ դատավոր թեկնածու լինելու համար մի քանի պահանջներ կան, օրինակ տարիքային ցենզ կա. կարծում եմ՝ Գագիկ Ջհանգիրյանը 40-ն անց է, ունի բարձրագույն կրթություն, բնականաբար ինքը համապատասխանում է այդ պահանջներին, այլ խնդիր է, որ կառավարությունը կամ ՀՀ նախագահը կամ Դատավորների ընդհանուր ժողովը կառաջադրեն նրան, թե ոչ: Այս մասին այսօր՝ հունիսի 30-ին, ԱԺ-ում լրագրողների հետ զրույցում նշեց ԱԺ «Իմ քայլը» խմբակցության պատգամավոր Նիկոլայ Բաղդասարյանը՝ անդրադառնալով դիտարկմանը, որ ՍԴ դատավորի թեկնածուների շարքում շրջանառվում է Գագիկ Ջհանգիրյանի եւ ՄԻ նախկին պաշտպան Կարեն Անդրեասյանի անունները:
«Ես կարծում եմ, որ ՀՀ-ում կան հնարավոր թեկնածուներ, որոնք ունեն այդ գիտելիքները, որոնց կարող են առաջադրել որպես ՍԴ դատավորի թեկնածու: Շատ նորմալ է, որ որոշ դատավորների լիազորությունները դադարում են, նորերը նշանակվում են:
Կարեն Անդրեասյանն էլ կարող է թեկնածու լինել, որովհետեւ ներկայացված պահանջներին բավարարում է՝ տարիքային ցենզ, աշխատանքային փորձ, իրավաբանական կրթություն եւ այլն»:
Դիտարկմանը, որ ԱԺ շուրջ 10 պատգամավորներ վարակվել են կորոնավիրուսով, այսինքն մնացած պատգամավորներից շատերը կոնտակտավոր են, բայց գալիս են նիստերին, «Իմ քայլը» պատգամավորն ասաց. «Իհարկե, ցանկալի կլիներ, որ ոչ մեկը չհիվանդանար, որ իրար կողքի չնստեին, որ դահլիճն ավելի մեծ լիներ: Բայց երբ հասկանում ես, որ պետության մեջ խնդիրներ կան եւ դու այդ խնդիրների մեջ որպես պատգամավոր դերակատարում ունես, դու պարտավոր ես գաս նիստին եւ քո պարտքը կատարես պետությանը»:
