NEWS.am-ին հաջողվել է պարզել Ֆրանսիայի Նիցցա քաղաքի Ֆրանսուա Գրոսսո փողոցում մայիսի 6-ին սպանված հայազգի «օրենքով գողի» ինքնությունը: Նա 39-ամյա Էդվարդ Մարգարյանն է, ով քրեական շրջանակներում հայտնի է որպես «Հոկտեմբերյանցի Էդո»: Նրա հետ մեկտեղ, ըստ NEWS.am-ի աղբյուրների, սպանվել է նաեւ քրեական հեղինակություն Աբդուլա Էրզանուկաեւը` «Ավստրիացի Աբդուլա» մականունով:
Նախնական տեղեկություններով` սպանությունը տեղի է ունեցել Սուխումիի բնակիչ 40-ամյա Անդո Սարգսյանի տանը: Նրա եւ իրեն հյուր եկած Մարգարյանի եւ Էրզանուկաեւի միջեւ վեճ է ծագել: Հարեւանները, լսելով աղմուկ եւ կրակոցներ, ոստիկանություն են կանչել: Դեպքի վայր ժամանած ոստիկանության աշխատակիցները ձերբակալել են տնից դուրս եկած մի տղամարդու, ով եղել է երկու երեխաների հետ: Ոստիկանական բաժանմունքում ձերբակալված քաղաքացին հայտնել է, որ վեճի ժամանակ նյարդերը տեղի են տվել եւ նա կրակել է իրեն հյուր եկած երկու անձանց վրա:
Մեկ այլ վարկածի համաձայն, Սարգսյանն ի վիճակի չէր լինի միանգամից երկու մարդ սպանել, եւ չի բացառվում, որ «օրենքով գողի» եւ քրեական հեղինակության սպանության հարցում երրորդ անձ է ներգրավված եղել:
Մարգարյանի մարմնից հանվել է 22 մմ-անոց տրամագծով փամփուշտ, սակայն մինչեւ այժմ չի պարզվել` արդյոք երկու զոհերն էլ միեւնույն զենքի՞ց են սպանվել, թե` ոչ:
Ըստ տեղեկությունների, սպանված ղազախական ծագմամբ չեչեն գործարար Աբդուլլա Էրզանուկաեւը մի քանի տարի առաջ Ֆրանսիայում քաղաքական ապաստան է ստացել: Նա ապրել է Նիցցայում, եւ պարբերաբար ճամփորդությունների մեջ է եղել: Նա Ֆրանսիայի չեչենական համայնքում ազդեցիկ դեմք էր համարվում եւ հանդես էր գալիս որպես «հարց լուծող»:
Ինչ վերաբերում է «Հոկտեմբերյանցի Էդոյին», ապա, ըստ շրջանառվող լուրերի, նա թագադրվել է 1997 թվականին հայ «օրենքով գող» Օգանով եղբայրների երաշխավորությամբ, ովքեր այդ ժամանակ հակասության մեջ էին «Դեդ Հասանի» հետ:
Էդվարդ Մարգարյանը երկար ժամանակ ապրել է Բարսելոնայում, իսկ Նիցցա էր եկել` կնոջն ու երեխաներին տեսակցելու համար: Որոշ տեղեկությունների համաձայն, «օրենքով գողը» հին վեճ է ունեցել չեչենական խմբավորումների հետ: Նախանցած տարի Էդոն դաժան ծեծի է ենթարկվել նրանց կողմից, սակայն նրան հաջողվել է ողջ մնալ:
NEWS.am-ի տեղեկություններով` առաջիկա օրերին Էդվարդ Մարգարյանի դին պետք է տեղափոխվի Հայաստան` հուղարկավորության նպատակով:
Նշենք նաեւ, որ, ըստ տարբեր աղբյուրների, սպանության կասկածյալն ու սպանված հայազգի «օրենքով գողը» Նիցցայի նախկին հոգեւոր հովիվ (այժմ Ստրասբուրգի հոգեւոր հովիվ) Տեր Վաչեի շրջապատից են: Տեր Վաչեն, ըստ շրջանառվող լուրերի, երբ տարիներ առաջ Նիցցայում չեչեներից մեկի կողմից հայ է դանակահարվել, տեղի հայերին խորհուրդ է տվել վրեժխնդիր լինել։ Նրա խորհրդին հետեւելով` դանակահարվածը վրեժ է լուծել իրեն դանակահարողից: Նշվում է նաեւ, որ Տեր Վաչեն օգտագործում է եկեղեցու ներքեւի սրահը՝ այնտեղ կասկածելի մարդկանց հետ հավաքներ ու կերուխումներ կազմակերպելու համար, որոնց ներկա են լինում նաեւ քրեական արարքներ թույլ տված մարդիկ:
Հիշեցնենք, որ Ֆրանսիայի ոստիկանությունն այժմ քրեական հանցակցության մեղադրանք է առաջադրել Տեր Վաչեին, Մայր աթոռ Սուրբ Էջմիածինն էլ աշխատում է` նրան Հայաստան տեղափոխելու ուղղությամբ: Այս կապակցությամբ NEWS.am-ին չհաջողվեց մեկնաբանություն ստանալ Մայր Աթոռից: