Թուրքական օրինագծը նախատեսում է, որ Facebook-ը, YouTube-ը, Twitter-ը, Instagram-ը, TikTok-ը եւ այլ սոցիալական ցանցերը պետք է նշանակեն օրինական ներկայացուցիչ Թուրքիայում, որին դատարանները կարող են դիմել կոնտենտը հեռացնելու կամ օգտատերերի տվյալները տրամադրելու խնդրանքով, գրում է Hürriyet-ը:

Բացի այդ, սա նշանակում է, որ սոցիալական ցանցերը կարող են ֆինանսական պատասխանատվություն կրել եւ հարկեր վճարել Թուրքիայում։

Իշխող «Արդարություն եւ զարգացում» կուսակցությունը ձգտում է դադարեցնել անանունությունը սոցիալական ցանցերում, եւ ակնկալվում է, որ սոցիալական ցանցերի կայքերը կներդնեն համակարգեր՝ իրենց օգտատերերի ինքնությունը հաստատելու համար: Ըստ օրինագծի՝ այս հարթակները պետք է նաեւ թուրք օգտատերերին վերաբերող իրենց տվյալները պահեն Թուրքիայում։

Միաժամանակ, օրինագիծը սահմանում է մինչեւ 50 միլիոն եվրոյի հասնող զգալի տուգանքներ, եթե նրանք չկատարեն Թուրքիայի կառավարության պահանջները, եթե սոցիալական ցանցերը չեն կարող արագ հեռացնել ատելության խոսքերն ու այլ անօրինական կոնտենտները իրենց հարթակներից:

Առաջարկվող օրենքի համաձայն, ցանկացած սոցիալական բովանդակություն պետք է հանվի 24 ժամվա ընթացքում: Էրդողանը ձգտում է արագացնել օրենքի ընդունումը, նախքան խորհրդարանը արձակուրդ կգնա: Հավանաբար սոցիալական ցանցերի մասին դրույթը անմիջապես կներկայացվի խորհրդարան եւ ուժի մեջ կմտնի մինչեւ հուլիսի 15-ը։