Քաղաքացիները թանկ են վճարում Կովիդ-19-ի դեմ պայքարելու համար: Այս մասին facebook-ի իր էջում գրել է ԱԺ «Լուսավոր Հայաստան» խմբակցության քարտուղար Գեւորգ գորգիսյանը:

Նա, մասնավորապես, նշել է. «Ինձ է դիմել քաղաքացի Արա Նազարյանը՝ հայտնելով, որ իրենց ամբողջ ընտանիքը Կովիդ-19-ով է վարակվել: Ծնողների բուժումը տանն է կատարվել, դեղորայքի եւ բուժքրոջ համար վճարել են 250 հազար ՀՀ դրամ, տան անդամներին համակարգչային տոմոգրաֆիայի (ԿՏ) համար եւս վճարել է Արա Նազարյանը՝ 160 հազար ՀՀ դրամ:

Տանը բուժում ստանալուց հետո ծնողների վիճակը չի բարելավվել, տեղափոխել են հիվանդանոց՝ հիվանդանոցային պայմաններում բուժումն իրականացնելու: Թեստավորում կատարելուց հետո ծնողների թեստերի արդյունքները հիվանդանոցում կորցրել են եւ միայն 7 օր անց հայտնել են, որ թեստի պատասխանները բացասական են, որից հետո դուրս գրվելու համար քաղաքացիներից պահանջել են մոտ 500 հազար ՀՀ դրամ: Արա Նազարյանը դիմել է ՀՀ առողջապահության նախարարություն, նամակ է ուղարկել նաեւ նախարարի ֆբ էջին, հարցին որեւէ լուծում չի տրվել, նախարարը չի արձագանքել ֆբ հաղորդագրությանը:

Նշեմ, որ քաղաքացին բախվել է նաեւ մեկ այլ խնդրի. քանի որ բնակվում է Երեւանում, բայց գրանցված է մարզում, հիվանդանոցներում եւ պոլիկլինիկաներում հրաժարվել են թեստավորում իրականացնել՝ պահանջելով, որ Կովիդով 19-ով վարակված հիվանդը գնա Գյումրի կամ համատիրությունից փաստաթուղթ ներկայացնի:

Ինքս անձամբ քաղաքացու բարձրացրած խնդրով դիմել եմ նախարարին՝ հաղորդագրություն ուղարկելով նրա ֆբ էջին: Ավելացնեմ նաեւ, որ ես նույնպես որեւէ պատասխան չեմ ստացել նախարարից:

Առողջապահության ոլորտի պատասխանատուների աշխատանքի գնահատականը թողնում եմ քաղաքացիներին։