Օրինագծում առաջարկվող փոփոխություններն ուղղված են հանքային ռեսուրսների ռացիոնալ եւ արդյունավետ օգտագործմանը: Այս մասին հուլիսի 8-ին ՀՀ Ազգային ժողովի արտահերթ նստաշրջանում «Ընդերքի մասին» օրենքում եւ հարակից օրենքներում փոփոխություններ եւ լրացումներ կատարելու մասին օրինագծերի փաթեթի քննարկման ժամանակ ասաց ՀՀ տարածքային կառավարման և ենթակառուցվածքների փոխնախարար Լիլիա Շուշանյանը:
Այսուհետ առաջարկվում է արդյունահանման թույլտվություն չտրամադրել, եթե այս տարածքում հանքավայրի պաշարները չեն ուսումնասիրվել եւ հաստատվել: «Մետաղների համար՝ վերջին 5 տարվա ընթացքում, եւ այլ նյութերի համար՝ վերջին 10 տարվա ընթացքում»,- պարզաբանեց Շուշանյանը:
Փոխնախարարը նաեւ նշեց, որ հանքավայրերն այսուհետ կտրամադրվեն ոչ թե մասնակի, այլ բոլոր ռեսուրսների ամբողջական օգտագործման համար: «Այսուհետ հանքավայրերը չեն բաժանվի տարբեր ձեռնարկությունների միջեւ»,- շեշտեց փոխնախարարը: